swastha 3

गथांमुगः व घण्टाकर्ण छगू हे मखु

नेवा: अनलाइन न्युज – ललेन्द्र शाक्य | २०७८ श्रावण २२, शुक्रबार १३:११:५८

–विनय राजोपाध्याय

गथांमुगःयात घण्टाकर्ण न धायेगु याः, थ्व खँ पायछि मखु । घण्टाकर्ण धाःम्ह राक्षसया बाखं अलग्ग हे दु । व मेथाय् याम्ह द्यः माने मयाइम्ह नास्तिक खः । सायद व भारत, काशी याःम्ह जुइफु छाय् धाःसा अन कर्णघण्टा धाःगु पुखू दु नापं घण्टाकर्णया मूर्ति नं दु । अनया घण्टाकर्णया पौराणिक बाखं व थन नेपाःगाःया गथांमुगःया पौराणिकता अले थ्व गथांमुगः हनेगु कारण आपालं पाः ।

रुद्रायमल तन्त्रया बाखंनय् न्ह्यथनातःगु घण्टाकर्णयात छ्यायेफ्वायेयाना नेपाःगाःया तजिलजिइ ल्वाकछ्याना ब्युगुलिं थथे छगु हे थें खने दूगु खः । छगु इलय् खस समुदायया सञ्चार माध्यमय् बर्चश्व दयाच्वंगु इलय् नेवाः खँग्वःयात थः यत्थे भाय् हिलाः नेवाः भाषाय् गँ धयागु घण्टा अले थाः धयागु थायेगु अले मुगः धयागु ह्यामर–घन धया– थ्व “घण्टाकर्ण” नापं हे स्वापु दुगु नखः खः धकाः धयाबिल । थुकिं याना थ्व भ्रम ब्वलंगु ख । जबकि थ्व नखःया नां “गथांमुगः” खः “गँथाःमुगः” मखु ।

वास्तवय् गथांमुगः धयागु दुवाः वा प्यका लँ खः । किलागः, प्यगःथां, नौमुगः, चिकंमुगः, वंगः आदि त्वाःया नांया ल्युने वयाच्वंगु गः, थां, मुगः लं नं थ्व खँया पुष्टि यानाच्वंगु दु  ।

परापूर्वकालय् नेपालमण्डल छगु अति हे उब्जाउशील बुँ दुगु थाय् खः । जनसंख्या म्हो जुगु कारणं दक्वं बुँइ बुँज्या यायेत व इलय् सम्भव मजुया च्वंगु खः । निभाः, वाफय्, प्वं, ग्वफय् छुं मधाःसें बुँज्या फुक्कं बुँइ यायेगु अति हे थाकुगु ज्या खः । छुं जुयाः बुँज्या स्यन धाःसा वा बुँज्याः याये मखन धाःसा दँ न्यंक नयेत मथाइगु व अन्न संकट जुवने फइगु खः । उकिं थ्व ज्या दक्वं जानां सिनांसिनां जूसां थनया किसान तय्सं याये हे माःगु खः । धाइगु नापं दु सिनाज्या यायेगु इलय् छेँय् सुं मनु सित धाःसा नं व मनुया सिम्हया शतगती–काजक्रिया नापं मयाःसें सिनाज्या क्वमचातले सिम्हयात सुकुलिइ भुनाः कुँचाय् तया छेँजःपिं सकलें सिनाज्या यानाच्वनिगु व सिनाज्या क्वचाये धुंकाः तिनि शतगती–काजक्रिया याइगु हँ उगु इलय् । उकिं वाः पिइगु ज्यायात नेवाः भाषां सिनाज्याः धाइगु याः । थ्व सिनाज्या ला तसकं बल्लापिन्सं जक यायेफैगु ज्याः खः । तर देसय् फुक्क मनुत बल्लाइ मखु उकिं थज्याःगु ज्या यायेत भूतया साधना यानाः मनुया म्हय् भूत दुबिंकाः अज्याःगु ज्या पुवंकीगु खः । हरेक दँया सिनाज्या स्वयां न्ह्यं अक्षयतृतिया स्वयां छन्हु न्हयः “भूत दुकायेगु” धकाः शहरय् भूतयात दुकायेगु याइ । अले भूत दुब्यूम्ह मनुया ग्वाहालिं सिनाज्या अपुक हे यायेफइ ।

भूततय्त सिनाज्या क्वचायेके धुंकाः, भूतपाखें माक्वः ज्या कायेधुंकाः थुमित श्रावण कृष्ण चतुर्दशी अर्थात दिल्लागा चःह्रे गथांमुगः चःह्रेया दिंकुन्हु तान्त्रोक्तबिधि पुर्वक ख्यानाः छ्वइगु खः । गथांमुगः धयागु भूतत च्वनीगु मंकाः थाय् खः । थ्व छ्वासः (क्षेत्रपाल–चौबाटो) खः । थ्व दिंकुन्हु थःथःगु त्वालय् छ्वासय् तिंमाःया स्वंगु मुठा याना थनाः सुथंनिसें तयातइ । अले छेँखा पतिकं भूत ख्याना छ्वयेगु स्वरुप कतांमरीचा दयेकाः थुकि यखाय् हइगु खः । थ्व तिं कथि माय् ग्यानापूम्ह भूत वा लसिंयाः किपाः च्वयाः छम्ह मचाया म्हय् लाक्वपाक्व च्वया धौबजि धौभ्यगतय हे तया नकाः वहे धौभ्यगतय् जगाः फ्वङ्के छ्वया सनिलय् त्वाःयापिं सकलें जानां उकि थीथी कथंया तान्त्रिक पूजा याना छम्हु सु च्याकाः तिंकथि ग्वतुइका स्वकः चाहिकाः साला यंकाः खुसिइ चुइका छ्वइगु खः ।

थुगु दिं भूतत नापं थुखेउखे न्ह्याथाय् नं ध्वदुइ फइगुलिं सकसिनं नँया अंगु न्ह्याइगु याइ । धाइ नँ दुम्ह मनुयात भूतं दुःख बिइमखु हँ । बहनी सकसिगु छेँय् भूत हाकनं दुहाँ वइ धकाः मुलुखा तिनाः स्वपा तुति दुगु प्याकिं तानां बिषेश पूजा यानाः तारण तयेगु ज्या याइ । थ्वकथं भूतयात ख्यानाः छ्वयाः छेँ शुद्ध यायेबले सुलाच्वंम्ह भूत प्रेतत नं बिस्यु वनि धइगु जनबिश्वास दु । थ्वकथं छेँ शुद्धि यायेगुयात गथांमुगः ब्यंकेगु धकाः धाइ । यदि सिनाज्या क्वमचाःनिगु खःसा सिनाज्या क्वचायेका जक उगु छेँय् गथांमुगः ब्यंकेगु चलन दु ।

थ्व दिं थुकथं भूतप्रेत पिशाच सकसितं नगरं पिने ख्यानाः छ्वइगुलिं कुविद्या (बोक्सी बिद्या) सयेके न्ह्यापिं, तान्त्रिकत मशानय् वना भूततय्त लोभं क्यंकाः बशय् तया थःगु स्वार्थ सिद्ध यायेगु नापनापं थःपिनिगु तन्त्रशक्तियात अझं बल्लाकेगु ज्या याइ । धाइ बोक्सी विद्याय् उबले जक पारंगत जूगु तायेकि हँ गबले सुं बोक्सी थः चीधिकः जुया छगु करुवाय् दुहाँ वना अखुंचां पिहां वयेफइ अथेहे तःधिकः जुयाः थःगु ल्हाःपातय् तःमाःगु वंगल सिमायात तया फातापुइके फइ हँ । थुजोगु अलौकिक क्षमता दयेकेत तान्त्रिक वा बोक्सीत थ्व दिं कुन्हु अवश्य नं नगर पिनेया मशानय् च्वंगु शक्तिपीठय् थ्यंकः वनी अले थूगु गथांमुगः चःह्रेया चान्हे थःगु तन्त्रविद्यायात झन शक्तिशाली जुइत अन तन्त्र साधना याना च्वनि ।

थ्व साधनाय् इमिसं मनूया नरबलि बिइत व मनुया हंस (आत्मा) सालाः  तुफिया न्हिप्यं तया, प्यपा तुतिं चुइकाः, दुगुचा च्वलेचाथें खिपतं चिनां सालाः यंकाः हेँग्वाःया लाः, फिया बजि,  दयेका नकाः बलि बिइगु जुयाच्वन । धाइ कि थज्याःगु बलि थःहे भाःतया बिइफत धाःसा व बोक्सीथें शक्तिशाली मेपिं सुं न जुइ फइमखु हँ । थ्वकथंया किपाःत झीसं ग्वलय् जयबागीश्वरया देगः व यलया म्वःमदु गल्लीइ म्वःमदु द्यः (छिन्नमस्ता)या अंगलय् खंकेफइ । थथे गथांमुगःया सब्बु चान्हे पूजा याः वैपिं बोक्सीतयेसं थःगु पतिंचा मैनमतथें च्याकाः लँ स्वस्वं थःगु तुति फसये छिनाः बयें मथ्युसें वइ । गुम्हेस्यां गुलि पतिंचा च्याकि व उलि हे स्युपिं धकाः सिइके फइ ।

गथांमुगःचःह्रेया सब्बु चान्हय् भूतप्रेतया साधना यात धाःसा याकनं तन्त्रविद्या सयेकेफइगु जनबिश्वास नं दु । खय्तला भूतप्रेतया खँ थौंकन्हेया ल्याय्म्ह ल्यासेतय्त अपाच्य जुइफु तर झी पूर्खां थुकियात स्वीकार यानातःगु दु । थ्व नेपालमण्डलया थःगु हे परम्परा खः । थःगु मौलिक तजिलजिइ गर्व याये सयेके । कृपया गथांमुगःयात घण्टाकर्ण धायेगु ज्या मयाये । अझ गुलिं गुलिंसिनं ला “गथांमुगः”या नां हे स्यंकाः “गठेमंगल” नं धायेगु यानाः वयाच्वंगु दु । थ्वला पूर्णत बिकृति खः । गथांमुगःयात बाह्य सांस्कृतिक आक्रमणं बचे यायेनु ।

Categorized in बिचा: