2565 buddha Jayanti ADV

गण्डकीया मुख्यमन्त्री पृथ्वी सुब्बा गुरुङ पदमुक्त

नेवा: अनलाइन न्युज – ललेन्द्र शाक्य | २०७८ जेठ २७, बिहिबार १९:२६:००

गण्डकी प्रदेशया मुख्यमन्त्री पृथ्वी सुब्बा गुरुङ पदमुक्त जूगु दु । आः संविधानया धारा १६८ उपधारा ५ कथं न्हूगु सरकार गठनया प्रक्रिया सुरु जुइ ।

प्रदेशसभाया दकले तःधंगु दलया नेताया हैसियतय् २९ बैशाखय् मुख्यमन्त्री नियुक्त जूम्ह गुरुङं बिहिवाः प्रदेशसभाय् विश्वासया मत फ्वंगु खः । तर, वया पक्षय् २७ मत वःगु खःसा विपक्षय् ३० मत कुतुंवंगु खः ।

सभामुख नेत्रनाथ अधिकारीं मुख्यमन्त्रीया पक्षय् २७ मत, विपक्षय् ३० मत, छम्ह सांसद मतदानय् सहभागी मजूगु न्यंकूगु खः ।

मतदानय् प्रदेश सरकारया युवा व खेलकुदमन्त्री दीपक मनांगे अनुपस्थित जूगु खःसा राष्ट्रि«य जनमोर्चाया सांसद कृष्ण थापा तटस्थ च्वंगु खः । नेपाली कांग्रेसया १५ म्ह, नेकपा माओवादी केन्द्रया ११ म्ह, जनता समाजवादी पार्टीया निम्ह व राष्ट्रि«य जनमोर्चाया सांसदपिं पियारी थापा व खिमबिक्रम शाहीं धाःसा विपक्षय् मतदान याःगु खः ।

छु जुइ न्हूगु सरकार गठनया प्रक्रिया ?

धारा १६८ या उपधारा ३ कथं नियुक्त मुख्यमन्त्री गुरुङ पदमुक्त जुइधुंकाः धारा १६८ उपधारा ५ कथं न्हूगु सरकार गठनया लँपु चाःगु दु ।

उपधारा ५ य् धयातःगु दु, ‘उपधारा ३ कथं नियुक्त मुख्यमन्त्रीं उपधारा ४ कथं विश्वासया मत कायेमफुसा उपधारा २ कथंया सुं नं दुजलं प्रदेशसभाय् विश्वासया मत कायेफइगु अवस्था जुसा प्रदेश  प्रमुखं उज्वःम्ह दुजःयात मुख्यमन्त्री नियुक्त याइ ।’

आः प्रदेश प्र्रमुखं मुख्यमन्त्री नियुक्तया नितिं प्रदेशसभाया विश्वासया मत कायेगु आधारय् न्ह्यब्वयेत प्रदेशसभाया सुं नं दुजःयात आह्वान याइ ।

विपक्षी गठबन्धनया पाखें नेपाली कांग्रेस संसदीय दलया नेता कृष्णचन्द्र नेपाली पोखरेलं दाबी यायेगु तयारी याःगु दु । कांग्रेसया १५, माओवादी केन्द्रया ११ म्ह (सभामुख बाहेक), जनता समाजवादी पार्टीया निम्ह व राष्ट्रि«य जनमोर्चाया निम्ह यानाः ३० म्ह सांसद पोखरेलयात मुख्यमन्त्री दयेकेगु तयारीइ दु ।

मुख्यमन्त्री गुरुङ नेतृत्वया सरकारय् युवा व खेलकुदमन्त्री जूम्ह स्वतन्त्र सांसद राजीव गुरुङ उर्फ दीपक मनांगें कित्ता हिलाः विपक्षी गठबन्धनपाखें वःगु दु ।

यदि मनांगें साथ ब्यूसा मुख्यमन्त्री नियुक्तया नितिं माःगु ३१ मत विपक्षी गठबन्धनं खाकी ।

धारा १६८ उपधारा ५ मुख्यमन्त्री नियुक्त जुइमफुत धाःसा संविधानया धारा १६८ उपधारा ७ कथं प्रदेशसभा भंग जुइ व गण्डकी प्रदेशय् मधयावधि निर्वाचन घोषणा जुइ ।

Categorized in राजनीति