nepal investment baink

गण्डकीइ सुथंनिसें वा वल, थौं बुधवाः वा वइगु व च्वापुवा गाइगु सम्भावना

नेवा: अनलाइन न्युज | ने.सं. ११४४ सिल्लाथ्व द्वादसी

थौं बुधवाः देसया थीथी थासय् मौसम बदली जुयाः वा वइगु व च्वापुवा गाइगु सम्भावना दु ।

जल व मौसम पूर्वानुमान महाशाखाया कथं आः नेपालय् पश्चिमी निम्नचापीय प्रणालीया लिच्वः लाःगु दु ।

महाशाखाया कथं आः गण्डकी प्रदेशया छगू निगू थासय् हल्का वा वयाच्वंगु दुसा मधेश प्रदेश व बागमती प्रदेशय् साधारण कथं बदली जुयाच्वंगु दु ।

थौं बुधवाः न्हिनय् देय् न्यंकं आंशिकनिसें साधारण कथं बदली जुइगु सम्भावना दु ।

मधेश प्रदेश लिसें देसया पहाडी भूभागया छुं छुं थासय् नँ न्यानाः ल्हाबसा त्वययाः हल्का वा वइगु सम्भावना दु ।

देसया उच्च पहाडी व हिमाली भूभागया छुं छुं थासय् हल्कानिसें मध्यम च्वापुवा गाइगु लिसें ल्यंदूगु उच्च पहाडी व हिमाली भूभागया छुं छुं थासय् हल्का च्वापुवा गाइगु सम्भावना दूगु महाशाखां जानकारी ब्यूगु दु ।

अथेहे, थौं बुधवाः बहनी देय् न्यंकं आंशिकनिसें साधारण कथं बदली जुइगु खनेदु । सुदूरपश्चिम प्रदेश, कर्णाली प्रदेश व गण्डकी प्रदेशया छुं छुं थासय् व देसया ल्यंदूगु पहाडी भूभागया छगू निगू थासय् नँ न्यानाः ल्हाबसा त्वयाः हल्का वा वइगु सम्भावना दूगु महाशाखां जानकारी ब्यूगु दु ।

देसया उच्च पहाडी व हिमाली भूभागया छुं छुं थासय् हल्का च्वापुवा गाइगु सम्भावना दु ।

Categorized in राष्ट्रिय