2565 buddha Jayanti ADV

गण्डकीइ मुख्यमन्त्रीया नितिं दाबी पेश यायेत आह्वान

नेवा: अनलाइन न्युज – ललेन्द्र शाक्य | २०७८ जेठ २८, शुक्रबार १६:०६:०९

गण्डकी प्रदेश प्रमुख सीताकुमारी पौडेलं २४ घौया ई बियाः मुख्यमन्त्री नियुक्तिया नितिं आधार पेश यायेत आह्वान याःगु दु ।

संविधानया धारा १६८ उपधारा ३ कथं नियुक्त मुख्यमन्त्री पृथ्वीसुब्बा गुरुङ पदमुक्त जुइधुंकाः १६८ धाराया उपधारा ५ कथं सरकार नीस्वनेगु प्रक्रिया सुरु जूगु खः । प्रदेश प्रमुख पौडेलं कन्हय् शनिवाः २९ गते न्हिनय् ३ ता ईतक मुख्यमन्त्री नियुक्तिया नितिं आधार पेश यायेत प्रदेशसभा दुजःपिन्त आह्वान याःगु खः ।

विपक्षी गठबन्धनया पाखें नेपाली कांग्रेस संसदीय दलया नेता कृष्णचन्द्र नेपाली पोखरेलं मुख्यमन्त्रीइ दाबी पेश यायेगु तयारी याःगु दु । कांग्रेस सांसद कुमार खडकां धाःगु दु, ‘५ ता ईया दुने थौं शुक्रवाः हे वनेगु कथं तयारी जुयाच्वंगु दु । फुक्क सभागृहय् मुनाः बहुमत थ्यंकाः दाबी यायेत वनेगु जुइ ।’

बैशाख २९ गते संविधानया धारा १६८ उपधारा ३ कथं प्रदेशसभाया दकले तःधंगु दलया संसदीय दलया नेताया हैसियतय् मुख्यमन्त्री नियुक्त जूम्ह पृथ्वीसुब्बा गुरुङं बिहिवाः सदनय् विश्वासया मत माग याःगु खः । ६० म्ह दुजःया प्रदेशसभाय् मुक्कं २७ मत काःम्ह गुरुङ स्वतः पदमुक्त जूगु खः ।

मुख्यमन्त्री पदमुक्त जूगु खबर प्रदेश ज्याकुथि सचिवालयं शुक्रवाः छ्वयेधुंकाः प्रदेश प्रमुख पौडेलं न्हूगु सरकार नीस्वनेगु प्रक्रिया न्ह्याकूगु खः ।

Categorized in राजनीति