nepal investment baink

गण्डकीइ देवकोटा व मनाङें नल मन्त्रीया सपथ, राप्रपा सरकारय् वने मानेमजुल

नेवा: अनलाइन न्युज – ललेन्द्र शाक्य | नेपाल संवत ११४४ तछलाथ्व पंचमी (२०८१ जेष्ठ २९ गते) मंगलवाः

गण्डकी प्रदेशया न्हूपिं निम्ह मन्त्रीपिन्सं सपथ नःगु दु । थौं मंगलवाः सुथय् मन्त्री नियुक्त जूपिं फणिन्द्र देवकोटा व दिपक मनाङें मन्त्रीया सपथ नःगु खः ।

देवकोटां उर्जा व मनाङें भौतिक पूर्वाधारमन्त्रीया सपथ नःगु खः । मनाङें थ्वसिबें न्ह्यः नं वहे पदय् च्वंगु खः । इमित प्रदेश प्रमुख डिल्लीराज भट्टं पद व गोपनीयताया सपथ नकूगु खः ।

देवकोटां माओवादीया ह्वीप अट्टेर यासें फ्लोर क्रस यानाः मुख्यमन्त्री सुरेन्द्रराज पाण्डेयात विश्वासया मत ब्यूगु खः ।

सोमवाः माओवादी केन्द्रया चुनाव चिं ईंचा मुगःचापाखें विजयी नेपाल समाजवादी पार्टीया सांसद फणिन्द्र देवकोटां ह्वीप जारी जूसां नं फ्लोर क्रस यासें मुख्यमन्त्री पाण्डेयात विश्वासया मत ब्यूगु खः । वहे बापत वं मन्त्री पद उपहार कायेखंगु खः ।

मुख्यमन्त्री पाण्डें राप्रपापाखें पंचराम तमुयात मन्त्री दयेकेत प्रस्ताव याःगु खः । तर, राप्रपां तत्काल सरकारय् वनेगु विषयस निर्णय मजूगु जानकारी ब्यूगुदु ।

थ्वलिसें दिपक मनाङें खुक्वःगुखुसि मन्त्री जूगु दु । प्रदेशसभाया निक्वःगु कार्यकालय् जक मनाङे निक्वःतक मन्त्री जुइधुंकूगु दु । सुरुइ सुरेन्द्रराज पाण्डे अल्मतय् लायेधुंकाः मनाङे भौतिक पूर्वाधार व यातायात व्यवस्थामन्त्री जूगु खः । पाण्डे सरकार क्वःदलेधुंकाः नं मनाङे खगराज अधिकारी सरकारय् वहे मन्त्रालयस दोहोरे जूगु खः ।

थ्वसिबें न्ह्यः पृथ्वी सुब्बा गुरुङ नेतृत्वय् निक्वःतक व कृष्णचन्द्र नेपालीया पालय् छक्वः यानाः स्वक्वः युवा व खेलकुदमन्त्री जुइधुंकूगु दु ।

Categorized in राजनीति