1142 nhoo dan adv

गज्जब का...मिसाया जँय् ‘दुरुपा’

२०७२ भाद्र २५, शुक्रबार १०:११:१८

जँया जवय् दयावःगु छातीया दुरुपा आकारया ‘लाग्वारा’या हुनिं व मनुखं झिदँसिबें अप्वः ई पीडा सह यात । तर अन्ततः डाक्टरपिन्सं व जँया ‘दुरुपा’थें जाःगु लाग्वारायात सर्जरी यानाः लिकयाइगु जूगु दु ।
आयरल्याण्डया डब्लिनया छम्ह ४६ दँया मिसा थःगु जँया जवय् च्वंगु ‘दुरुपा’ आकारया लाग्वारा क्यनाः छगू क्लिनिकय् वासः यायेगु नितिं वन । डाक्टरपिनसं उगु लाग्वारायात पुत्तुपुइकाः स्वल, थिया स्वल, तिया स्वल । उगु दरुपाथें जाःगु छ्वाल्लुसे मच्वंसे छाःगु जुयाच्वन ।
१० दँ न्ह्यःनिसें उगु लाग्वारा वःगु व लिपा जुजुं स्वदँया दुने ला ह्वात्त हे तःप्वः जुया वःगु उम्ह मिसां धाल । आः उगु लाग्वारा १९ सेमी तःहाकः व ६.७ सेमी चौडाइ जुइधुंकूगु दु ।
गनं उगु लाग्वारा सार्कोमा क्यान्स जकं मखुला धैगु शंका जयाः डाक्टरतसें परीक्षण यात । तर परीक्षणया झ्वलय् व तन्तुतय्गु क्यान्सर अर्थात सार्कोमा मजूसे फ्याट कोषिकातसें दयेकूगु ट्युमर अर्थात् लिपोमा जूगू सीदत । वास्तवय् व छुं नं कथंया दुरुपा मखु ।
डाक्टरतय्गु कथं विश्वय् मनूतय्गु म्हगलय् दइगु दकसिबें तःधंगु दाः (बोसो)या ग्वारातमध्ये छगू खः । तर थपाय्ग्वःगु ग्वारा जुयावःसां नं उम्ह मिसां याकनं वासः यायेगु नितिं मवःगुलिं डाक्टरपिं अजू चाःगु दु ।
बिएमजे जर्नलय् प्रकाशित जूगु बुखँया कथं उम्ह मिसाया आः याकनं हे सर्जरी यानाः व लाग्वारा लिकाइगु जूगु दु व आः नं उम्ह मिसा वेटिङ्ग लिष्टय् च्वनाच्वंगु दु ।
मिसाया म्हगःपाखें उगु लाग्वारा लिकायेधुंकाः उगु लाग्वारा लना स्वइ व उकियात आधिकारिक रुपय् चिकित्सा विज्ञानय् सुचिकृत याइ ।