1142 nhoo dan adv

गंसीपिं मोडल प्रतिबन्धित : मखुसा ८० लाख जरिवाना

२०७१ चैत्र २१, शनिबार ०६:२४:३०

फेशनया राजधानी फ्रान्सय् अल्ट्रा थीन (अति गंसीपिं) मोडलपिंत प्रतिबन्ध तःगु दु । फ्रान्सया संसदय् मतदानपाखें थुगु कानुनयात पास याःगु खः । थुगु कानुनयात कयाः फ्रान्सय् जक मखु मेमेगु आपालं देसया नं मोडलिङ एजेन्सीतय्सं विरोध याःगु दु । तर इजरायल, स्पेनलिसें आपालं देसं थुगु कानुनया समर्थन नं याःगु दु ।

नेशनल एसेम्बलीइ न्ह्यब्वःगु कानुनय् धयातःकथं गुम्ह मिसाया बडि मास इण्डेक्स (बिएमआई) निश्चित लेबल सिबें म्हो जुइ, वयात मोडलिङ यायेगु अनुमति दइमखु । यदि निश्चित लेभलसिबें म्हो बिएमआई दुसा उम्ह मोडलयात ७५,००० युरो (थ्यंमथ्यं ८० लाख) तका जरिवाना नं पुइकीसा वं खुलातक जेलसजाय नं फयेमाली ।

बिएमआई धायेबलय् सुं नं मनूया ग्यसु व वया धिकःया अनुपात खः ।

थ्वसिबें न्ह्यः फ्रान्सया स्वास्थ्यमन्त्रीं मोडलतय्त थःगु खानपानय् व उसाँयया निंतिं ध्यान तयेत निर्देशन नं ब्यूगु खः । 

आपालं मोडलिङ एजेन्सीतय्सं थुगु कानुनया विरोध यासें थुकिं अन्तर्राष्ट्रिय कासाय् ब्वति काइपिं मोडलतय्त असर लाकीगु खँ पितहयाच्वंगु दु ।

फ्रान्सया स्वास्थ्य मन्त्रालयया कथं अन ४०,००० सिबें अप्वः मोडलत ‘अति दुर्बलता’या शिकार जुयाच्वंगु दु गुकिइ ९० प्रतिशत ला मिसापिं मोडल हे दु ।