Header Nepal rastra bank Adv

गंगालाल अस्पतालया कर्मचारी आन्दोलित, धर्नालिसें पेनडाउन यायेगु ख्याच्वः

नेवा: अनलाइन न्युज – ललेन्द्र शाक्य | २०७९ बैशाख ५, सोमबार १६:२२:५६

शहीद गंगालाल राष्ट्रिय हृदयरोग केन्द्रया कर्मचारी ल्हाःतय् हाकूगु पट्टी चिनाः आन्दोलनय् क्वाहाँ वःगु दु ।

सेवा सर्त व सुविधधा सम्बन्धी नियमावली २०५८ या खुक्वःगु संशोधन प्रक्रिया क्वमचाःगु धासें कर्मचारीपिन्सं विरोध कथं हाकूगु पट्टी चिनाः सेवा ब्यूगु दु ।

शहीद गंगालाल राष्ट्रिय हृदयरोग केन्द्र कर्मचारी संघया नायः आत्माराम तिमल्सिनां खुक्वःगु संशोधन प्रक्रिया क्वमचाःबलय् कर्मचारीपिनिगु वृत्ति विकास व बढुवा जुइमफूगु धासें आन्दोलनय् क्वाहाँ वयेमाःगु धाःगु दु ।

अस्पतालय् ज्या यानाच्वंपिं चिकित्सक, नर्सिङ, प्राविधिक व अप्राविधिक कर्मचारीपिन्सं सोमवाः ल्हाःतय् हाकूगु पट्टी चिनाः ज्या याःगु खः ।

तिमल्सिनां धाःगु दु, ‘जिमिसं तःक्वःमछि थ्व विषयस अस्पताल प्र्रशासनयात ध्यानाकर्षण याकूगु दु । तःक्वःमछि आश्वासन जक बिल । तर, आःतक नं थ्व विषयस नेतृत्व तह गम्भीर जूगु खनेमदुनि । थौं सोमवाःनिसें विरोध कथं हाकूगु पट्टी चिनागु दु । कानून संशोधनया प्रक्रिया न्ह्यःने मवंगु खण्डय् धर्ना तकं बियाः पेनडाउन यायेगु तकया पलाः न्ह्यःने न्ह्याकेगु जुइ ।’

विरोध कथं इमिसं ल्हाःतय् हाकूगु पट्टी चिइगु ज्याझ्वःलिसें न्यागू बुँदे आन्दोलनया ज्याझ्वः सार्वजनिक याःगु दु ।

थःपिनिगु माग पूवंकेगु नितिं संघं अस्पताल व्यवस्थापन पक्षयात १४ गतेतकया अल्टिमेटम ब्यूगु दु ।

बैशाख ९ गतेतक नं संशोधनया प्रक्रिया क्वमचाःसा फुक्क कर्मचारीपिन्सं हाकूगु पट्टीलिसें व्यवस्थापनया ज्याकुथिइ न्हिथं निघौ धर्ना बिइगु, ११ गतेतक संशोधन मजूसा धर्ना लिसें पेनडाउन यायेगु, १४ गतेतक नं मजूसा व्यवस्थापनयाा ज्याकुथिइ धर्नालिसें तालाबन्दी यायेगु ज्याझ्वः इमिसं क्वःछिनातःगु दु ।

Categorized in लजगाः