zero media family planning adv

ख्वपय् न्हापांगुखुसि उसु अवार्ड २०७७ जुइगु

नेवा: अनलाइन न्युज – ललेन्द्र शाक्य | २०७७ चैत्र १९, बिहिबार १३:०९:५४

नेपाःया कासाख्यःया इतिहासय् हे न्हापांगुखुसि उसु अवार्ड २०७७ ख्वपय् जुइगु जूगु दु ।

उसु कासाया विकास व उसु कासाप्रति सम्मान लिसें प्रोत्साहन यायेगु आज्जुं ख्वपया नागरिक विकास वचत व ऋण सहकारी संस्था लिमिटेड कौललटार व योयो ब्यांक्वेट सूर्यविनायकया प्रायोजनय् उगु अवार्ड लःल्हाइगु जूगु दु ।

जिल्ला खेलकुद विकास समिति ख्वपया पहल व नेपाल उसु स्वयंसेवक प्रशिक्षक कमिटीया ग्वसालय् वइगु चैत्र २१ गते शनिवाः योयो ब्यांक्वेटय् छगू समारोह दथुइ न्हापांगु उगु अवार्ड २०७७ लःल्हाइगु ख्वप जिल्ला खेलकुद विकास समितिया नायः लिसें योयो ब्यांक्वेटया संचालक श्रीभक्त कासिछ्वां जानकारी ब्यूगु दु ।

उसु अवार्ड लःल्हायेगु नितिं नागरिक विकास वचत व ऋण सहकारी संस्था लिमिटेडया नायः नुनम सुब्बा, ख्वप जिल्ला खेलकुद विकास समितिया नायः कासिछ्वा व अवार्ड कजि राजीव महर्जनं सम्झौता पतिइ ल्हाःचिं तयाः कालबिल याःगु दु ।

मुक्कं ५ लख ६० हजारया अवार्ड लःल्हायेगु ज्याझ्वलय् नागरिक विकासं नगद सिरपाःया नितिं माःगु रकम व योयो ब्यांक्वेटं ज्याझ्वः व्यवस्थापनय् तुइगु सकतां खर्च ब्यहोरे यायेगु कथं प्रायोजन याःगु कासिछ्वां जानकारीं ब्यूगु दु ।

ज्याझ्वलय् खुम्ह कासामिपिन्त नगदलिसें अवार्ड लःल्हानाः सम्मान याइगु जूगु दु । उसुया सान्सौं व थाउलो पाखे समान छम्ह छम्ह, मिजं मिसा यानाः प्यम्ह कासामिपिन्त नगदलिसें अवार्ड लःल्हाइगु जूगु दु ।

उदयीमान कासामिया रुपं छम्ह छम्ह मिजं व मिसा यानाः निम्ह कासामिपिन्त अवार्ड व नगदपाखें पुरस्कृत याइगु जूगु दु ।

च्याक्वःगु राष्ट्रिय खेलकुद व १३ क्वःगु एसियाली खेलकुद (साग) या प्रदर्शनयात आधार दयेकाः कासामि छनोट याःगु अवार्ड लःल्हायेगु ज्याझ्वःया कजि राजीव महर्जनं जानकारी ब्यूगु दु ।

उसु कासाया विकास व विस्तारय् ताःई न्ह्यःनिसें समर्पित जुयाः योगदान यानाः वयाच्वंम्ह छम्हेसित लाईफ टाइम एचिभमेन्ट अवार्डपाखें सम्मान याइगु जूगु दुसा वंगु झिदँ न्ह्यःनिसें उसु प्रशिक्षकया रुपं सेवा यानाः वयाच्वंम्ह प्रशिक्षकयात नं प्रशंसा पौपाखें सम्मान याइगु जूगु दु ।

नेपालय् हे न्हापांगुखुसि ख्वपपाखें उसु अवार्ड लःल्हायेगु सुरुवात यायेदूगुलिं मुक्कं ख्वपबासीया नितिं लसता व गौरवया खँ जूगु धासें समितिया नायः लिसें योयोया संचालक श्रीभक्त कासिछ्वां अवार्ड वितरण ज्याझ्वः तःजिक यायेगु जानकारी ब्यूगु दु ।

सिरपाःया मू प्रायोजक नागरिक विकासया नायः सुब्बां उसुया कासामिपिन्त लःल्हाइगु उगु अवार्डलिसे स्वायेदयाः लसता पिज्वःगु न्ह्यथंसें अवार्डया सुरुवातं कासामिपिनिगु मनोबल अप्वइगु लिसें देसया शान उच्च यायेत ग्वाहालि जुइगु भलसा काःगु दु ।

अवार्ड वितरणय् सहयोगात्मक भूमिका म्हिताः वयाच्वंगु हिमाल साकोसया नायः विज्ञान राई नं ख्वपय् छुं नं कासाया विकास व धेंधेंबल्लाय् थुगु पुचलं आर्थिक व भौतिक रुपं निरन्तर ग्वाहािल यानाः वयाच्वंगु व उसुया विकासय् नं थप ग्वाहालि यायेगु धाःगु दु ।

अथेहे, भोलियन्टर उसु कमिटीया नायः मंजुर महर्जनं अवार्डलिपा राष्ट्रियस्तरया उसु कासा ग्वसाः ग्वसें भोलियन्टर उसु कोच कमिटीया रुपं विकास यानाः यंकेगु आज्जु दूगु धाःगु दु ।

अवार्ड लःल्हाइगु ट्रफी बुधवाः सार्वजनिक याःगु दु । नागरिक विकासया नायः सुब्बा, योयोया संचालक कासिछ्वा, अवार्ड कजि महर्जन व हिमाल साकोसया नायः राई नं मंकाः रुपं ट्रफी अनावरण याःगु खः ।

Categorized in कासा