nepal investment baink

ख्वपय् निपु म्येया म्युजिक भिडियो पितब्वज्या नापं होलि ज्याझ्वः

नेवा: अनलाइन न्युज – विजयरत्न | ने.सं. ११४४ चिल्लाथ्व पुन्हिं (२०८०चैत्र १२) सोमवाः

ख्वपया महाकालि नृत्य कला परिषदया ग्वसालय् ख्वपय् नेवाः होलि महोत्सव ज्याझ्वः जूगु दु ।

उगु ज्याझ्वलय् नेवाः कलाकारिता ख्यःया आपालं कलाकःमि मुना थःथवय् रंग इला होलिया भिन्तुना देछाःगु खः ।

अथेहेतुं उगु ज्याझ्वलय् निर्देशक विश्वास बज्राचार्यया ‘बसन्तया बेला...’ व निर्देशकं बालमुकुण्द प्रजापतिया ‘दिलमाया...’ बोलया निपु म्युजिक भिडियो पितब्वज्या नं जूगु खः ।

परिषद्या न्वकु ओमचरण अमात्यया सभानायःसुइ जूगु उगु ज्याझ्वलय् कलाकारिता ख्यःया न्ह्यलुवाः आशाकाजी थकु मूपाहाँ कथं झायादीगु खः ।

ज्याझ्वलय् नेपालभाषाया न्हांपाम्ह सिने पत्रकार विजयरत्न असंबरे, नांजाःम्ह नेवाः संकिपाकःमि सुरेन्द्र तुलाधर, संगीतकार जुगल डंगोल, भक्तपुर लेडि जेसिजया पुलांम्ह नायः सबिका त्वायनाबासु, परिषदया मू सल्लाहकार ध्रुबनारायण श्रेष्ठ लिसेंया व्यक्तिपिन्सं मंकाः कथं पितब्वज्या जूगु निपु म्येया म्युजिक भिडियोया निर्देशकपिं बिश्वास बज्राचार्य व बालमुकुण्द प्रजापतिपिं पाहाँ कथं उपस्थित जुयादीगु खः ।

सांगितिक ज्याझ्वः नं जूगु उगु ज्याझ्वलय् सरस्वति मानन्धर, कृष्ण महर्जन, नेवाः आइडल मन्जिल शाक्य, जयलक्ष्मी सिद्धि बज्राचार्य लगायतं म्ये हाला न्यंकादीगु खः ।

Categorized in कला