nepal investment baink

ख्याः थें जुल भुखाय्या धक्का

ने.सं. ११३५ बछलाथ्वः सप्तमि (बैशाख १२) या तःभुखाय् लिपा मदिक्क पराकम्पन वया हे च्वंगु दनि । आः चिचीधंगु पराकम्पनयात मनूतय्सं उलि वास्तातकं मयाये धुंकूगु दुसा अय् ब्वल का हला धइगु प्रतिक्रिया बीगु यानाहःगु दु ।
भुखाय्या प्रिशकलिपा चिचीधंगु जक कम्पन जूसां छुं जुइला धकाः ग्यानाच्वंपिं मनूत आः अप्वः धयाथें खुल्ला चौर व सतकय् बासं च्वनाच्वंगु दु ।
आः थथे चिचीधंगु धक्का वल कि मनूतय्सं ख्याःकथं कायेगु यानाहःगु दु ।
नेपाल राष्ट्रिय भूकम्प मापन केन्द्रया कथं गोरखाया बारपाकयात केन्द्रविन्दु दयेकाः ७.८ रेक्टरया भुखाय् ब्वये धुंकाः थौंतकया दुने २४९ क्वः ४ रेक्टरं च्वय्या पराकम्पन जुइधुंकूगु दु ।
आःतकया पराकम्पन मध्ये बछलाथ्वः अष्टमि (बैशाख १३) व अनंलिपा बछलागाः नवमि (बैशाख २९) या पराकम्पन ६ रेक्टरं च्वय्या खः ।
तःभुखाचं थौंतकया दुने च्याद्वः खुसः व २२ म्ह मनूतय् ज्यान काःगु दुसा झिंखुद्वलं मल्याक घाःपाः जूगु दु ।
बछलाथ्व सप्तमिया भुखाय् लिपा मनूत थःथःगु छेँय् वनाः च्वं वंगु खःसा बछलागा नवमि खुनुया पराकम्पनलिपा मनूत थौंतक नं धुक्क जुयाः छेँय् च्वंवंगु मदुनि । भुखाय्या ग्याःचिकु मनूतय् नुगलय् स्वचानाच्वंगु दु ।
भुखाय्या पराकम्पन मदिसेंलि मनूत उतिकं हे ग्यानाच्वंगु दु । भुगर्भविद्पिसं आः तत्काल तःधंगु भुखाय् ब्वइमखु तर पराकम्पन गुबले तक वइ थ्व धाःसा धाये मफुगु खँ धयाच्वंगु दु ।
मेखे मंगलवाः पिदंगु अन्नपूर्णपोष्टय् अमेरिकाय् ज्या यानाच्वंम्ह छम्ह भू्गर्भविदं धाःसा नेपालय् थुगुसी ब्वःगु भुखाय् फरक प्रकृतिया जूगु बिचाः व्यक्त यानादीगु दु । वय्कलं रेक्टर स्केलया ल्याखं गुगु परिमाणय् बँ सनेमाःगु खः उलि संकूगु खनेमदुगु धयादीगु दु । वय्कलं आः तत्काल ८ रेक्टरतकया भुखाय् ब्वइगु संभावना १० प्रतिशत जक दुगु धयादीगु दु ।
वय्कलं थ्व भुखाय् लिपा आःया हे केन्द्रविन्दु जुयाः तःधंगु भुखाय् ब्वयेत ७० निसें ८० दँ काइगु खँ नं न्ह्यथनादीगु दु ।
न्ह्यागु हे धाःसां चिचीधंगु भुखाय्या धक्कायात आः मनूतय्सं वास्ता मयाये धुंकल । तर अझ नं छेँय् दुहाँ वनेत धाःसा ग्याःचिकु दनि ।
थ्व झ्वलय् देय्या अतिकं प्रभावित थीथी थासय् राहत वितरणया ज्या न्ह्यानाच्वंगु जूसां स्वनिगः व थुकिया जःखः धाःसा राहत बीपिनि ध्यान मवनाच्वंगु पीडितपिनि धापु दु । ‘स्वनिगलं पिने भुखाचं पीडितपिनि निंतिं खाद्यान्ननिसें थीथी राहत सामग्रीत इन धइगु बुखँत न्हियान्हिथं वयाच्वंगु दु । तर भुखाय् ब्वःगु थुलिमछि दये धुंकलं नं जिमित थौंतक सुनां नं न्यँ तकं वःगु मदुनि’ थ्व धापु खः खौपाय् छेँ दुंम्ह भाजु दृष्टिनारायण महर्जनया ।
वय्कलं राहत दइगु आसय् तःक्वः हे थःपिनि छेँ दुगु नागार्जुन नगरपालिकाया वडा ४ या ज्याकुथिइ वनागु जूसां अनया सचिवं माक्व राहत मवःगु धासें राहत मब्यूगु खँ कनादीगु दु ।
थुकथं हे खौपाय् हे छेँ दुंम्ह लक्ष्मी महर्जनं धयादी, ‘सरकारं थुलि राहत बी, उलि राहत बी धकाः थनं घौछि तापाःगु हरिसिद्धि, सितापाइलातक वनाः निवेदन तः वना । तारन्ताः ग्वाहालि माल धकाः धाः नं वना । तर पाल छपाः तक नं मब्यू ।’
‘थन खुद्वः पाल माःगुली स्वसः जक पाल वःगु व नं इनाः फुइधुंकूगु गाविस सचिवं धाल । जिमित न त आर्थिक न त मेमेगु छुं कथं हे ग्वाहालि, राहत ब्यूगु दु’ लक्ष्मी महर्जनं धयादिल, ‘छेँ दुनाः धराप जुयाच्वन, थुना सां बीमाल धयां थःपिसं हे थुं । जिमिसं थुनेगु मखु धाल ।’
वय्कलं दुनावःगु छेँ लँय् लाःगुलिं थःपिसं हे ज्यामि तयाः भग्नावशेष चीकाः लँ चायेका बियागु खँ कनादिल ।