coved ad

खोप मकाःपिं मनूतय्गु नितिं ओमिक्रोन खतरनाक भाइरस : डब्ल्यूएचओ

नेवा: अनलाइन न्युज – ललेन्द्र शाक्य | २०७८ पौष २९, बिहिबार १४:५३:४१

कोभिड १९ या ओमिक्रोन भेरियन्ट विशेष यानाः खोप मकाःपिं मनूतय्गु नितिं खतरनाक भाइरस जूगु विश्व स्वास्थ्य संगठन (डब्ल्यूएचओ) या महानिर्देशक टेड्रोस अधानोम गेब्रेयससं बुधवाः न्ह्यथंगु दु ।

टेड्रोसं कोभिड १९ बारे पत्रकार सम्मेलनय् धाःगु दु, ‘अयसां ओमिक्रोन डेल्टासिबें म्हो गम्भीर भाइरस खः तर विशेष यानाः खोप मकाःपिनिगु नितिं धाःसा थ्व खतरनाक हे जुइ ।’

टेड्रोसं थुकिया संक्रमण दर तीव्र जूगु व फुक्क लागाय् ब्वलंगुलिं सतर्क जुइत तकं आग्रह याःगु दु ।

डब्ल्यूएचओ प्रमुखं अफ्रिकाया कोभिड खोपया दरयात न्ह्यथंसें धाःगु दु, ‘अफ्रिकाय् ८५ प्रतिशतसिबें अप्वः मनूतसें खोपया छगू खुराक प्राप्त याये ल्यंदनि । झीसं थ्व अन्तरयात बन्द मयाःतलेतक झीसं महामारीया तीव्र चरण समाप्त यायेफइमखु ।’

वं धाःगु दु, ‘जिमिसं प्रगति यानाच्वना, डिसेम्बरय्, कोभ्याक्स अन्तरगत नोभेम्बरय् छ्वयागु डोजया ल्याः दोब्बरसिबें अप्वः छ्वयेगु जुइ व वइगु दिनय् १ अर्ब खोप डोज छ्वयेगु कुतः यायेगु जुइ ।’

टेड्रोसं वंगु दँ झीसं भोगेयानागु छुं आपूर्ति अवरोधत आः सहज जुयावःगु धासें धाःगु दु, ‘तर थुगु दँया मध्यतकया दुने प्रत्येक देसया ७० प्रतिशत जनसंख्यायात खोप बिइगु आज्जुइ थ्यंकेत अझ नं ताःहाकःगु यात्रा याये ल्यंदनिगु तकं न्ह्यथंगु दु । ९० गू देसं अझ नं ४० प्रतिशत आज्जुइ थ्यंकेफूगु मदुनि व उपिंमध्ये ३६ गू देसं थःपिनिगु जनसंख्याया १० प्रतिशतसिबें म्हो खोप काःगु दु ।’

‘डब्ल्यूएचओ व झीगु साझेदारपिन्सं उगु देसयात नेतृत्व व समन्वयस, आपूर्ति दृश्यताया कमी प्रदान याःगु खोपया चीहाकःगु शेल्फ लाइफ, सीमित कोल्ड चेन क्षमता, खोप आत्मविश्वास, स्वास्थ्यकःमिया अभाव, व प्रतिस्पर्धी प्राथमिकताय् सामना यायेगु अवरोधत चिइकेत सक्रिय रुपं समर्थन यानाच्वंगु दु ।’ डब्ल्यूएचओ प्रमुखं धाःगु दु ।

Categorized in अन्तर्राष्ट्रिय