zero media family planning adv

खोनाय् प्रहरी आतंक : स्थानीय बासिन्दाया बुइँ प्रहरी हस्तक्षेप

नेवा: अनलाइन न्युज – ललेन्द्र शाक्य | २०७७ आषाढ १५, सोमबार १५:२३:४१

थौं असार १५ गते, यलया खोनाया बासिन्दापिं सुथ न्हापां हे बुइँ वा पिइत छेँपाखें पिहाँ वन ।

सुडोल फाँटय् बुँ पालेगु, प्वः तयेगु, लँ मुंकेगु लिसेंया ज्या यायेत्यंगु हे इलय् प्रहरीया छगू बथान बुइँ थ्यंकल व खोनाया बासिन्दापिनिगु ज्याय् हां भुनेथें भुनाः पंगः थन । प्रहरी व खोनाया बासिन्दापिनिगु दथुइ ल्हाःतं चलेयायेगु ट्याक्टर खोसाकोस तकं जुल ।

खोनाया स्थानीय बासिन्दापिन्सं धाःगु दु, जिमिसं थःपिनिगु बुइँ ज्या यायेत त्यनाबलय् प्रहरी वयाः हस्तक्षेप यानाः पनेत स्वल ।

प्रहरीं छाय् हस्तक्षेप यात स्थानीयया बुँ ?

सुडोल फाँट येँ व निजगढ स्वाइगु फास्ट ट्रयाकय् लाः । सुडोल फाँटयात आः फास्ट ट्रयाकया जिरो किलोमिटर धाइ । उगु क्षेत्रया जग्गा सरकारं अधिग्रहण याःगु दु । उकिं खेतीपाती यायेत प्रहरीं हस्तक्षेप यानाः पंगः थंगु खः ।

तर थःपिन्त विस्थापित यानाः फास्ट ट्रयाक दयेकेत्यंगु धासें खोनाया बासिन्दापिन्सं सुरुनिसें हे विरोध यानाः वयाच्वंगु दु । खोनाया बासिन्दां धाःगु दु, जिमिसं सरकारपाखें मुआब्जा नं कयागु मदु । तर अधिग्रहण याःगु जग्गा जूगुलिं खेतीपाती यायेमते धकाः प्रहरीं धम्की बियाः धयाच्वंगु दु ।

स्थानीय बासिन्दाया कथं स्थानीयपिन्त उगु क्षेत्रय् खेतीपाती याके मबिइत थ्यंमथ्यं निगू दर्जन प्रहरीया बथान परिचालन याःगु खः ।

खोनाया बासिन्दापिन्सं खेतीपाती याये मखंसा, वा पिइमखंसा थःपिनिगु प्वाः खाली जुइगु धाःगु दु । स्थानीय बासिन्दां धाःगु दु, खोनाय् फास्ट ट्रयाक जक मखु, न्हयगू च्यागू मेमेगु परियोजना नं लाकातःगु दु । थ्व परियोजनापाखें खोनाया बासिन्दापिन्त पूर्ण रुपं विस्थापित यायेत्यंगु दु सरकारं । आपालं छेँजःपिनिगु ला थन बिस्थापित जुइधुंकाः मेथाय् च्वनेगु, खेती यायेगु जग्गा छुं मदु ।

स्थानीय बासिन्दाया कथं प्रहरीं हस्तक्षेप यानाः पनेत्यंसां नं स्थानीय बासिन्दां थःगु ज्यायात निरन्तरता ब्यूगु दु ।

Categorized in राष्ट्रिय