nepal investment baink

खेलकुद मन्त्रालयं नेपाल संवत छ्यलेगु जुइ : मन्त्री विराजभक्त श्रेष्ठ

नेवा: अनलाइन न्युज – ललेन्द्र शाक्य | ने.सं. ११४४ सिल्लागा अस्तमि (२०८० चैत्र ४ गते) आइतवाः

युवा व खेलकुद मन्त्री विराजभक्त श्रेष्ठं थःपिनिगु मन्त्रालय अन्तर्गत लाःगु युवा व खेलकुद मन्त्रालय नं नेपाल संवतयात छ्यलीगु खँ धयादीगु दु ।

म्हिगः शनिवाः येँय् काठमाडौं सुनचाँदी व्यवसायी संघया न्हयक्वःगु अधिवेशनय् मूपाहाँ कथं उपस्थित जुयादिसें थथे थःगु सम्बोधनया झ्वलय् उगु खँ धयादीगु खः ।

मन्त्री श्रेष्ठं खेलकुद मन्त्रालय दुने गुलि नं पौ छ्वयेगु जुइ, उकी नेपाल संवत नं न्ह्यथनेगु खँ कनादिसें थःपिं संस्कृति सम्पदाया आन्दोलनया बलं थनतक थ्यंकागु खँ कनादिल ।

वय्कलं सुनचाँदी व्यवसाय दुने थीथी कथंया समस्यायात ज्यंकेगु नितिं थःपिं न्ह्यचिलेगु बचं बियादिसें काठमाडौं सुनचाँदी व्यवसायी संघं देय् न्यंकंया व्यवसायीपिन्त मार्गनिर्देशन यायेमाःगु विचाः नं तयादिल ।

मन्त्री श्रेष्ठं लुँ वहःया ज्या धैगु येँ देसं हे न्ह्याःगु व्यवसाय जूगु हुनिं थुकिया नेतृत्व व मार्गनिर्देशन बिइगु ज्या नं येँय् च्वंपिं लुँ वहः व्यवसायीपिनिगु जुइमाःगु धासें थःपिं थुगु हे व्यवसाय याइपिं दाजुपिनिगु दथुइ ब्वलंम्ह व्यक्ति जूगु खँ नं तयादीगु खः ।

Categorized in राष्ट्रिय