zero media family planning adv

खुदँलिपा दशरथ रंगशालाय् सिनियर टिमया फुटबल

नेवा: अनलाइन न्युज – ललेन्द्र शाक्य | २०७७ चैत्र १३, शुक्रबार ११:०८:१०

घरेलु मैदान, घरेलु टिम, घरेलु दर्शक । तर कासाय् न गोल जुल न लिच्वः नेपालं अपेक्षा याःथें वल ।

अखिल नेपाल फुटबल संघ (एन्फां) ग्वसाः ग्वःगु त्रिदेशीय कप फुटबल अन्तर्गत नेपालं म्हिगः बिहिवाः किर्गिस्तानया लोलम्पिक (यू २३) टिमलिसे म्हितूगु खः ।

त्रिदेशीय कपया निगूगु कासाय् नेपाःया सिनियर व किर्गिस्तानया ओलम्पिक टिम म्हितूबलय् त्रिपुरेश्वरय् च्वंगु दशरथ रंगशालाय् थ्यंमथ्यं ७ हजारया ल्याखय् दर्शक उपस्थित दूगु खः ।

नेपाःया कासामिपिन्सं कासाय् बागू दर्जनसिबें अप्वः अवसर काःसां नं गोल याये धाःसा मफुत । थःगु न्हापांगु कासाय् नेपालं किर्गिस्तानया युवा टिमलिसे गोलरहित बराबरी कासा म्हिताः ल्याः इनाकाल ।

थ्व लिच्वलं कासाया मेगु टिम बंगलादेश धाःसा फाइनल थ्यंगु दु । आः शनिवाः जुइगु नेपाः व बंगलादेशया कासापाखें फाइनल थ्यनीगु मेगु टिम सु खः सीदइ ।

नेपालं बंगलादेशलिसे बराबरी कासा जक म्हितूसां नं फाइनल थ्यनीगु अवसर आपालं दु नेपाःयात । किर्गिस्तान फाइनल थ्यंकेत धाःसा शनिवाः जुइगु कासाया लिच्वः किर्गिस्तानया हे अनुकूल वयेमाः ।

दशरथ रंगशालाय् नेपाःया सिनियर फुटबल टिमं सन् २०१५ लिपा न्हापांगुखुसि म्हितूगु खः । वंगु दँ मंसीरय् जूगु १३ क्वःगु सागय् नेपाःया यू २३ टिमं फुटबलय् स्वर्ण त्याकूसां नं व सिनियर स्तरया मखु । उकिं खुदँलिपा दशरथ रंगशालाय् सिनियर टिमया थ्व न्हापांगु कासा जुल ।

अथेहे, थुगु हे कासापाखें राष्ट्रिय टिमय् न्हापांगुखुसि लाःपिं स्वम्ह कासामि संजोग राई, त्रिदेव गुरुंगु व निशान खड्कां सिनियर टिमय् न्हापांगुखुसि म्हितूगु खः । मिडफिल्ड निम्ह संजोग व त्रिदेवं न्हापांगु रोजाइस म्हितूगु खःसा निशानं लिपांगु ४ मिनेट अवसर काःगु खः ।

बराबरी लिपा नेपाःया मू प्रशिक्षक बालगोपाल महर्जनं आः उपलब्ध जूगु मध्ये बेष्ट टिम म्हितकाःगु तर फरवार्ड स्कोरिंगय् चुकेजूबलय् नेपालं स्कोर यायेमफूगु धाःगु दु । महर्जनं अट्याकिंग थर्डय् खनेदूगु समस्या मेगु कासाय् सुधार यासें बांलाकेगु धाःगु दु ।

प्रशिक्षक बालगोपाल महर्जनं बंगलादेशविरुद्धया मेगु कासाय् ल्याः मुंकूसें फाइनल थ्यनीगु धाःगु दु ।

Categorized in कासा