prabhu baink new

खुक्वःगुखसिया च्याम्पियन लिग उपाधि बायर्नं त्याकल

नेवा: अनलाइन न्युज – ललेन्द्र शाक्य | २०७७ भाद्र ८, सोमबार ०८:०२:५९

जर्मन क्लब बायर्न म्युनिखं खुक्वःगुखुसि युरोपियन च्याम्पियन्स लिगया उपाधि त्याकूगु दु । आइतवाः चान्हय् १२ः४५ ता इलय् जूगु फाइनल कासाय् फ्रेन्च क्लब पेरिस सेन्ट जर्मेन (पीएसजी)यात १ व ० या गोल अन्तरं बुकाः बायर्नं ७ दँलिपा च्याम्पियन्स लिग उपाधि त्याकूगु खः ।

पोर्चुगलया लिस्वनय् जूगु कासाय् बायर्नयात त्याकेत पीएसजीया पूर्वकासामि किंग्सं कोमन कोमनं छगू जक गोल याःगु खः । वं ५१ औं मिनेटय् जोसअ किम्मिकया पासय् गोल यासें बायर्नयात अग्रता ब्यूगु खः । फ्रेन्च कासामिया उगु गोल हे पीएसजीयात बुकेत पर्याप्त जुल ।

थःगु हे देशया क्लबयात बुकेत गोल याःम्ह २४ दँया कोमनं करिअरया २० औं उपाधि त्याकूगु दु । न्हापांगुखुसि फाइनल थ्यंगु पीएसजीया च्याम्पियन्स लिग त्याकेगु म्हगस थुगुखुसि पूवंके मफुत ।

उखे सन् २०१३ लिपा न्हापांगुखुसि फाइनल थ्यंम्ह बायर्नं धाःसा च्याम्पियन्स लिगय् मेगु उपाधि थप यायेत ताःलात । च्याम्पियन्स लिग सर्वाधिक त्याकूगुलि बायर्न लिभरपुललिसें मंकाः रुपं स्वंगूगु थासय् थाहां वंगु दु । रियल मड्रिडं सर्वाधिक १३ व एसी मिलानं ७ क्वः उपाधि त्याकूगु दु ।

बायर्नं लिपांगुखुसि सन् २०१३ य् जर्मनीया हे बोरुसिया डर्टमण्डयात बुकाः उपाधि त्याकूगु खः । सन् १९७४,१९७५ व १९७६ स मद्दिक्क स्वक्वःतक उपाधि त्याकाः उपाधिइ ह्याट्रिक याःगु बायर्नं सन् २००१ य् नं उपाधि त्याकूगु खः ।

११ क्वः फाइनल म्हितूबलय् ६ क्वः उपाधि त्याकूगु बायर्न ५ क्वःतक धाःसा उपविजेता जूगु खः । बायर्नं थुगु सिजन छुं नं कासा मबुकूसे उपाधि त्याकूगु खः ।

२०१३ स घरेलु निगू ट्रफी व च्याम्पियन्स लिग त्याकाः ट्रेबल दयेकूगु बायर्नं थुगुखुसि नं ट्रेबल उपाधि त्याकूगु दु । बायर्न निक्वःतक ट्रेबल उपाधि त्याकूगु निगूगु क्लब जूगु दु । बायर्नं थुगु सिजन जर्मन बुण्डेसलिगा, जर्मन कप व च्याम्पियन्स लिग त्याकूगु खः ।

थुगु खुसि स्पानिस क्लब बार्सिलोनां २००९ व २०१५ य् निक्वःतक ट्रेबल त्याकूगु खः ।

Categorized in कासा