prabhu baink new

खाली ग्यास सिलिण्डरया मू २,१०० तका

नेवा: अनलाइन न्युज – ललेन्द्र शाक्य | २०७७ आश्विन २, शुक्रबार १३:०४:३७

नेपाल एलपी ग्यास उद्योग संघं ३ नम्बर प्रदेशय् एलपी ग्यासया खाली सिलिण्डरया धरौटी मू २,१०० तका क्वःछ्यूगु दु । बजारय् कम्पनी कथं सिलिण्डरया धरौटी रकमय् लाक्वपाक्व मू कयाहये धुंकाः एकरुपता हयेगु नितिं थुज्वःगु निर्णय याःगु संघया नायः गोकुल भण्डारीं जानकारी ब्यूगु दु ।

३ नम्बर प्रदेशय् शुक्रवाःनिसें लागू जूगु न्हूगु व्यवस्था कथं आः न्ह्याग्गु नं कम्पनीया सिलिण्डरलिसें न्यायेबलय् ३,४७५ तकासिबें अप्वः दां पुले म्वाःलीगु जूगु दु ।

निगमं क्वःछ्यूगु ग्यासया प्रतिसिलिण्डर मू १,३७५ तका व सिलिण्डरया धरौटी २,१०० तका यानाः सिलिण्डर ग्यासलिसें न्हूगु सिलिण्डरया मू निर्धारण याःगु नायः भण्डारीं धाःगु दु । नायः भण्डारीं धाःगु दु, ‘थ्वसिबें न्ह्यः सिलिण्डरलिसेंया ग्यास न्यायेबलय् उपभोक्तां ४,५०० तका दां पुलाच्वंगु गुनासो वःगु खः, आः उपभोक्ता ठगेजुइगु पाखें बचेजुइ ।’

सिलिण्डरया फ्याक्ट्री लागत १,९५० तका, ढुवानी ५० तका व कर १२१ तका यानाः धरौटी क्वःछ्यूगु भण्डारीं धाःगु दु । उद्योगं छुं विकल्प मब्यूसे उद्योग बन्द याःसा वा उपभोक्ता बसाइँ सरेजुयाः मेथाय् वंगु अवस्थाय् धाःसा डिलरपाखें धरौटी लितकाये खनी ।

तत्कालया नितिं ३ नम्बर प्रदेशय् च्वंगु २९ गू उद्योगया सिलिण्डरय् उगु निर्णय कार्यान्वयन जुइगु संघं जानकारी ब्यूगु दु ।

Categorized in बजाः