prabhu baink new

खाडीया श्रमिक ...वर्ग शत्रु...खःला प्रधानमन्त्री जु ? ...कांग्रेसया न्ह्यसः

नेवा: अनलाइन न्युज – ललेन्द्र शाक्य | २०७७ भाद्र ६, शनिबार १५:३१:१६

प्रमुख विपक्षी दल नेपाली कांग्रेसं विदेशय् च्वनाच्वंपिनिगु उद्धारय् जूगु ढिलाईप्रति असन्तुष्टि प्वंकूगु दु ।

सरकारं बिहिवाः जक पीसीआर टेष्ट सहज जूगु देसय् भाद्र १६ पाखें सशर्त नियमित उडान यानाः नेपाःमिपिन्त नेपाः हयेगु निर्णय याःगु खः । थथे वःपिं थःगु हे खर्चं ७ न्हुतक अनिवार्य होटल क्वारेन्टिइनय् च्वनेमाः ।

अथेहे, पीसीआर टेष्ट सहज मजूगु मुलुकतपाखें चार्टर उडानया माध्यमं हइ । वैदेशिक रोजगार कोषया रकमं उद्धार याइपिन्त धाःसा स्थानीय तहतसें दयेकूगु क्वारेन्टिनय् तयेगु मन्त्रिपरिषदया निर्णय दु ।

कांग्रेसं धाःसा हाकनं थिकेगु चार्टर फ्लाईटया टिकटनिसें फुक्क खर्च थःपिन्सं हे खर्च यायेमाःगु निर्णयपाखें श्रमिकया पीडाय् झन् पीडा थप याःगु धासें विरोधया सः थ्वयेकूगु दु ।

कांग्रेस प्रवक्ता विश्वप्रकाश शर्मां शनिवाः वक्तव्य सार्वजनिक यासें धाःगु दु, ६ महिनानिसें बेरोजगार जुयाः च्वनाच्वंपिं खाडी मुलुकय् वनाच्वंपिं नेपाःमि श्रमिकपिन्त चार्टर फ्लाइटया थिकेगु टिकट खरिद या धायेगु गुलि न्यायोचित जू ?

छगू ला चार्टर फ्लाइटया थिकेगु टिकट काटेयायेमाःगु, होटल क्वारन्टिनय् ७ न्हुया फुक्क खर्च ब्यहोरे यायेमाःगु, पीसीआर परीक्षण थःपिन्सं हे याकेमाःगु व गामय् थ्यंकेगु यातायात खर्च तकं थःपिन्सं हे खर्च यायेमाःगु...कांग्रेसं धाःगु, अनुकूल अवस्थाय् देसय् रेमिटेन्स छ्वयाः हयाः अर्थतन्त्रयात बल्लाकाच्वंपिं अन्नदातापिन्त प्रतिकूल इलय् सरकारं छाय् यानाच्वंन...वर्ग शत्रु...या ब्यवहार ?

थुकिं मछिंगु अवस्थाय् लाःपिं नेपाःमिपिनिगु उद्धारय् सरकारया मानवीय भावना म्हो, व्यापारया मस्तिष्क अप्वः खपत जूगु खनेदूगु कांग्रेसं धाःगु दु । लिसें न्हिं स्वंगः जक उद्धार फ्लाइट याःबलय् गुलिखे देसया नेपाःमि छेँय् लिहाँ वयेत महिनौं ई तुइगु चिन्ता तकं कांग्रेसं प्वंकूगु दु ।

Categorized in राजनीति