kmc bidya

खः, जि मिसा ! (सरिना बज्राचार्यया चिनाखँ)

–सरिना बज्राचार्य

चन्द्रागिरी नगरपालिका १५, नैकाप

खः, जि मिसा !
सुयागु नं पैतृक सम्पति मखु
सुनानं यायाःथे याकाच्वनिम्ह निर्जीव वस्तु मखु ।
सहयाये फत्तले सहयायेगु
अन्याय अत्याचार जुलकि
मिसा यागु मेगु रुप खः महाकाली धारण यायेगु ।।

खः, जि मिसा !
सुनानं धइथे च्वनीम्ह प्राणहीन कतांमरी मखु
यःतल्ले माया मतिना यायेगु,
मयलकि घृणा तिरस्कार यायेदइमखु
सम्मान याये मफूसा
अपमान नं यायेदइमखु
सुयानं खेलाँची मखु जि
याःयाःथे याकाः च्वनिम्ह ल्हाःतुति मदुम्ह अपांग मखु ।।

खः, जि मिसा !
लक्ष्मी, सरस्वती व दुर्गाया तेजस्वी शक्तिरुप दु
ए ! मूर्ख, म्हसिके फुसा जीवन सार जुइ छंगु

खः, जि मिसा  !
सुयागु नं पैतृक सम्पति मखु,
खहे मखु, गुबलें जुइ नं मखु ।।