nepal investment baink

क्रिप्टो संस्थापक ब्याङ्म्यान–फ्राइडयात नीन्यादँ जेल सजाय

नेवा: अनलाइन न्युज – ललेन्द्र शाक्य | ने.सं. ११४४ चिल्लागा खस्थि (२०८० चैत्र १८ गते) आइतवाः

क्रिप्टो कारोवारया झ्वलय् तःधंगु अनियमितता व ठगी याःगु द्वपं लाःम्ह साम ब्याङ्म्यान–फ्राइडयात अमेरिकी अदालतं नीन्यादँया जेल सजाय न्यंकूगु दु ।

अमेरिकी जिल्ला न्यायाधीश लेविस कप्लानं फ्राइडं थःत ब्यूगु द्वपंप्रति छुं पश्चाताप कथं मकाःगु धाःगु दु । चीधंगु इलय् हे अर्बपतिया धलखय् लाःम्ह फ्राइडं सिइकसिइकं वित्तीय कानूनत थःम्ह उल्लंघन मयानागु दाबी यानाः वयाच्वंगु खः ।

फ्राइडं अदालत न्ह्यःने थःम्हं गल्ती जूगु स्वीकार याःसां नं वित्तीय अपराध याःगुलि छुं पश्चाताप याःगु मदु ।

न्यायाधीश कप्लानं फ्राइडयात नीन्यादँया जेल सजाय क्वःछ्यूगु लिसें मेगु स्वदँ नं निगरानीइ तयेगु कथं आदेश ब्यूगु दु ।

फ्राइडयात ११ अर्ब अमेरिकी डलर भुत्तानी  यायेत नं आदेश ब्यूगु दु । वं उगु रकम थीथी व्यक्ति लिसें संस्थापाखें खुयाकाःगु अदालतं ठहर याःगु खः ।

फ्राइड चीधंगु इलय् हे क्रिप्टोया दुनियाँय् च्वय् थ्यंगु खः, व फ्राइड स्वीदँ मथ्यवं हे अर्बपति जूगु खः ।

सन् २०१९ स चीधंगु स्टार्ट अपया रुपं न्ह्याकूगु एफटिएकस क्रिप्टोयात विश्वया हे निगूगु तःधंगु क्रिप्टो करेन्सीइ रुपान्तरण यायेत फ्राइड ताःलाःगु खः ।

तर नोभेम्बर २०२२ स फ्राइडया क्वाहाँ वयेगु यात्रा न्ह्याःगु खः । अलामेडा रिसर्चया कथं, फ्राइडं एफटिएक्सपाखें अर्बौं डलर थःगु नीजि हेजफण्डय् छ्वःगु खः ।

Categorized in अन्तर्राष्ट्रिय