coved ad

क्रिकेट कासामिपिन्त याःगु कारवाहीस प्रचण्ड असन्तुष्ट, प्रधानमन्त्रीया याकल ध्यानाकर्षण

नेवा: अनलाइन न्युज – ललेन्द्र शाक्य | २०७८ पौष २, शुक्रबार १४:१६:५९

नेकपा माओवादीया नायः पुष्पकमल दाहाल प्रचण्डं क्रिकेट कासामिपिन्त याःगु कारवाहीबारे प्रधानमन्त्री शेरबहादुर देउवायात ध्यानाकर्षण याकूगु दु ।

शुक्रवाः सुथय् प्रधानमन्त्री देउवायात बालुवाटारय् नापलानाः प्रचण्डं क्रिकेट कासामिपिन्त याःगु कारवाहीबारे ध्यानाकर्षण याकूगु प्रचण्डया स्वकीय सचिव रमेश मल्लं जानकारी ब्यूगु दु ।

मल्लं धाःगु दु, ‘प्रधानमन्त्रीलिसेया नापलाये ज्याय् नायः प्रचण्डं क्रिकेट कासापाखें नेपाःयात विश्व न्ह्यःने म्हसीका बिइत योगदान याःपिं कासामिपिन्त दुरुत्साहित जुइगु कथं कारवाही याःगु गलत जुल धासें ध्यानाकर्षण याकूगु खः ।’

प्रचण्डया सचिवालयया कथं लिसलय् प्रधानमन्त्री देउवां थ्व कारवाहीबारे थःम्हं सिइकेगु धाःगु खः ।

वंगु मंसीर २९ गते नेपाल क्रिकेट संघ (क्यानं) राष्ट्रिय क्रिकेट टिमया कप्तान ज्ञानेन्द्र मल्ल व उपकप्तान दीपेन्द्र सिंह ऐरीलिसें प्यम्ह क्रिकेटरपिन्त कारवाही याःगु खः ।

प्रचण्डया स्वकीय सचिव रमेश मल्लया कथं माओवादी नायः प्रचण्डं प्रधानमन्त्री देउवायात कांग्रेस सभापतिइ निर्वाचित जूगुलिं बधाई तकं ब्यूगु खः ।

नापलायेगु झ्वलय् सदन सुचारु यायेगु लिसेंया समसामयिक राष्ट्रिय मुद्दाय् सर्वदलीय बैठक सःतेगु विषयस नं सहलह जूगु प्रचण्डया सचिवालयं जानकारी ब्यूगु दु ।

Categorized in कासा