नेवा: अनलाइन न्युज | २०८० आश्विन २, मंगलबार ११:३६:१६

क्यानडां छम्ह शिख नेताया हत्या द्वपनय् भारतया छम्ह कूटनीतिज्ञयात देश निकाला याःगु दु ।

थ्वसिबें न्ह्यः क्यानडाया प्रधानमन्त्री जस्टिन त्रुडों सोमवाः संसदय् सम्बोधन यायेगु झ्वलय् भारत सरकारया एजेन्टं जून महिनाय् क्यानडाया ब्रिटिश कोलम्बियाय् शिख समुदायया नेता हरदीप सिंह निज्जरया हत्या याःगु धाःगु खः । वं भारतय् सेप्टेम्बर ९ व १० य् ग्वसाः ग्वःगु जी–२० बैठकया इलय् थःपिन्सं थ्व मुद्दायात प्रधानमन्त्री नरेन्द्र मोदी न्ह्यःने ल्ह्वनागु जानकारी नं ब्यूगु खः ।

वधुंकाः क्यानडाया विदेशमन्त्री मेलनी जोलीं भारतया बरिष्ठ कूटनीतिज्ञयात देश निकाला याःगु जानकारी ब्यूगु खः । उम्ह भारतीय कूटनीतिज्ञबारे वं थप जानकारी धाःसा ब्यूगु मदु । अय्सां देश निकाला याःम्ह भारतीय कूटनीतिज्ञ क्यानडाय् भारतया इन्टेलिजेन्स प्रमुख जूगु धाःगु दु ।

सीबीसीं धाःसा देश निकाला याःम्ह भारतीय कूटनीतिज्ञ पवन कुमार राय जूगु दाबी याःगु दु ।

भारतं धाःसा क्यानडाया द्वपंया खण्डन याःगु दु । भारतीय विदेश मन्त्रालयं धाःगु दु, ‘क्यानडाय् छुं नं कथंया हिंसाय् भारत सरकार दुथ्याःगु द्वपं बिइगु हास्यास्पद जूगु दु ।’

क्यानडाया प्रधानमन्त्री त्रुडों धाःसा क्यानडादुने सुं नं नागरिकया हत्या याकेत विदेश सरकार दुथ्याःगु झीगु देशया सम्प्रभूताया उल्लंघन जूगु टिप्पणी याःगु दु । वं थ्व हत्याबारे अनुसन्धानया नितिं भारतयात दबाब बिइगु नं धाःगु दु ।

क्यानडाय् भारतीय मूलया १४ लखसिबें अप्वः नागरिक दूगु धाःगु दु । उपिंमध्ये आपालं शिख समुदायया दु । क्यानडाय् विपक्षी दल न्यू डेमोक्रेटिक पार्टीया नेता शिख समुदायया हे जगमित सिंह दु ।

Categorized in अन्तर्राष्ट्रिय