1142 nhoo dan adv

क्यानाडाया भान्कुभरय् धाकुफय् : द्वलंद्वः मनूतसें छेँ त्वःतल

नेवा: अनलाइन न्युज – ललेन्द्र शाक्य | २०७८ मङ्सिर १, बुधबार १५:२८:५९

क्यानाडाया भान्कुभरय् तच्वकं धाकुफय् वःगु दु । अधिकारीपिन्सं सतक व रेलमार्ड विच्छेद याःगु उगु धाकुफय्यात ‘शताब्दीइ छक्वः जुइगु मौसमी घटना’ धाःगु दु ।

धाकुफय् लिपाया खुसिबालं क्षति जुइधुंकाः पश्चिमी तटय् दूगु भान्कुभरतक वनेगु निगू सतकमार्ग बन्द याःगु बीबीसीं जानकारी ब्यूगु दु । सोमवाः वःगु धाकुफसं यानाः द्वलंद्वः मनूत थःगु छेँ त्वःतेत बाध्य जूगु बुखँय् न्ह्यथनातःगु दु ।

सोमवाः भान्कुभरं १२० माइलय् अवस्थित मेरिटया ७ हजारम्ह बासिन्दापिन्त छेँ त्वःताः मेथाय् वनेत धाःगु खः । वा व वाफय् मंगलवाः सनिलतक द्यूगु जूसां नं आपालं मनूत अझ नं अलपत्र जुयाच्वंगु दु ।

सतकमार्गय् वःगु चलखय् लानाः छम्ह मिसा सीगु व कम्ती नं निम्ह तनाच्वंगु उद्धारकर्तापिन्सं धाःगु दु । क्यानाडाया प्रहरीं भान्कुभरं २५० किलोमिटर तापाक्क च्वंगु लिलोइटय् छम्ह मिसाया सीम्ह लुयावःगु धाःगु दु ।

धाकुफय् लिपा भान्कुभरयात ल्यंदूगु मुलुकलिसे स्वाइगु ट्रान्स क्यानाडा हाइवे जलमग्न जूगु खः । अथेहे, कोकिहाला हाइवेया छगू खण्डय् खुसिबालं क्षति याःगु दु ।

Categorized in अन्तर्राष्ट्रिय