Mohanai 2078 KTM

क्याडिजलिसे हाकनं बराबरीइ बार्सिलोना

नेवा: अनलाइन न्युज – ललेन्द्र शाक्य | २०७८ आश्विन ८, शुक्रबार १०:१२:२८

स्पेनिस ला लिगाया उपाधि दावेदार बार्सिलोना क्याडिजलिसे बराबरीइ द्यूगु दु । क्याडिजया घरेलु मैदानय् शुक्रवाः सुथय् जूगु कासाय् बार्सिलोना गोलरहित बराबरीइ द्यूगु खः ।

बार्सिलोना ६५ औं मिनेटय् झिम्ह कासामिइ कःघाःगु खः । फ्रान्की डि जोङ ह्याउँगु कार्ड नयाः मैदानं पिहाँ वनेधुंकाः बार्सिलोना दबाबय् लाःगु खः । तर क्याडिजं उकिया फाइदा कायेत धाःसा ताःमलात । क्याडिजया प्रहार बार्सिलोनाया गोलकिपर स्टेगनं बचेयाःगु खः । व म्यान अफ दी म्याच जुल ।

आः जुयाच्वंगु सिजन खराब लिच्वःपाखे वनाच्वंगु बार्सिलोनाया थ्व मदिक्क निक्वःगु बराबरी कासा खः । थ्वसिबें न्ह्यःया कासाय् नं बार्सिलोना ग्रानाडालिसे थःगु हे मैदानय् १–१ गोलया बराबरीइ द्यूगु खः ।

वंगु दँया सिजनय् जक शीर्ष डिभिजनय् थाहाँ वःम्ह क्याडिजयात बार्सिलोनां बुकेफूगु मदुनि । वंगु सिजन न्हापांगु कासाय् बार्सिलोना क्याडिजलिसे २–१ गोल अन्तरं बूगु खः । मेगु कासाय् १–१ गोलया बराबरीइ द्यूगु खः ।

बराबरीलिसें बार्सिलोना ७ औं स्थानय् दु । न्यागूगु कासाय् निगू जित व स्वंगू बराबरी लिच्वः पिकाःगु बार्सिलोनाया ९ ल्याः दु । ६ ल्याः दयेकूगु क्याडिज १४ औं थासय् दु । शीर्ष थासय् दूगु रियल म्याड्रिडया खुगू कासापाखें १६ ल्याः थ्यंगु दु । निगूगु थासय् दूगु एट्लेटिको म्याड्रिडया १४ व स्वंगूगु थासय् दूगु रियल सोसिडाडया १३ ल्याः दु ।

शनिवाः बहनी जूगु कासाय् ग्रानाडायात ३–२ गोल अन्तरं बुकुसें सोसिडाड स्वंगूगु थासय् थाहाँ वंगु दु । सोसिडाडया जीतय् अरित्ज इलुस्टोन्डों निगू व माइकल मेरिनों छगू गोल याःगु खः । ग्रानाडाया जर्मन सान्चेज व लुइस मिल्लां गोल याःगु खः ।

Categorized in कासा