prabhu baink new

कोरोना वीमा : संक्रमण जुलकि २५,००० तका कायेखनी !

नेवा: अनलाइन न्युज – ललेन्द्र शाक्य | २०७७ भाद्र ३०, मंगलबार ०९:४६:२४

वीमा समितिं कोरोना वीमाया मापदण्ड संशोधन याःगु दु व, न्हूपिं वीमितयात कोभिड १९ संक्रमण पुष्टि जुइखतं विमांक रकमया २५ प्रतिशत जक बिइगु जूगु दु ।

आइसोलेसनय् च्वनेमाःसा बिल भर्पाइया आधारय् थप ७५ प्रतिशततक बिइगु जूगु दु ।

समितिया कथं भाद्र २८ गतेतक कोरोना वीमा याःपिनिगु हकय् धाःसा न्हूगु मापदण्ड लागू जुइमखु । इमिसं संक्रमण पुुष्टि जुइधुंकाः १ लख तका दां कायेखनी ।

व्यक्तिगत रुपं ६०० तका दां पुलाः व मंकाः कथं प्रतिव्यक्ति ३०० तका दां पुलाः वीमा यायेफइगु व्यवस्था दु । समितिं ७५ करोड दां म्हयेधुंकाः भाद्र १९ गते नीजि ल्याबय् कोरोना परीक्षण याःपिन्त वीमा रकम मबिइगु धाःगु खः । तर प्यख्येंरं आलोचना वयेधुंकाः समितिं आइतवाः जक नीजि ल्याबया रिपोर्टयात नं मान्यता बिइगु निर्णय याःगु खः ।

न्हूपिं वीमितयात न्हूगु मापदण्ड :

सोमवाःनिसें समितिं न्हूपिं वीमितपिन्त लागू जुइगु कथं न्हूगु मापदण्ड हःगु दु । वीमा समितिं उगु मापदण्ड संशोधन यासें १ लख तकाया वीमा याःम्ह मनूयाके कोरोना संक्रमण पुष्टि जूसा २५,००० तका दां जक कायेखनीगु व्यवस्था याःगु दु ।

तर वीमा याःम्ह मनू अस्पतालया आइसोलेसनय् च्वंगु अवस्थाय् बिल भर्पाइ पेस यानाः थप ७५ हजार तका दां कायेखनीगु संशोधित व्यवस्थाय् न्ह्यथनातःगु दु ।

गथेकि, सुं वीमित कोरोना संक्रमित जुयाः छेँय् हे आइसोलेसन च्वंसां राहत खर्च वातप २५ प्रतिशत दां अर्थात् १ लखया वीमा याःम्ह जूसां २५ हजार तका दां कायेखनी । यदि वीमित संक्रमित अस्पताल भर्ना जुइमाःसा चिकित्सकं प्रमाणित याःगु बिल भर्पाइ पेस याःसा अस्पताल भर्ना खर्च वापत अधिकतम ७५ प्रतिशततक अर्थात् ल्यंदूगु ७५ हजार तका दां कायेखनी ।

Categorized in बजाः