zero media family planning adv

कोरोना विरुद्ध ख्वपय क्वारेन्टिन, आइसोलेशननिसें ब्यवस्थापनया तयारी

नेवा: अनलाइन न्युज | २०७७ जेठ २१, बुधबार १०:२०:१०

सरकारं विदेशय् च्वंपिं नेपाली नागरिकयात लित हयेगु प्रक्रिया सुरु यायेवं ख्वपय् कोभिड १९ विरुद्ध ल्वायेत थीथी योजना नापं तयारी सुरु याःगु दु । विश्वय् महामारीया रुपय् न्यानाच्वंगु कोरोना भाइरस संक्रमण विरुद्ध ल्वायेत ख्वपया संकट ब्यवस्थापन समितिं (सिएमसीं) थीथी योजना सहित तयारी यानाच्वंगु दु । जिल्लाया राजनीतिक दलया प्रमुख, सुरक्षा निकायया प्रमुखनापं च्वंगु बैठकं वडा, नगर व जिल्ला स्तरय् कोरोना भाइरस संक्रमण पनेत योजनावद्ध रुपं जिम्मेवारी बहन यायेगु तयारी सुरु याःगु सिएमसीया संयोजक व ख्वपया प्रमुख जिल्ला अधिकारी हुमकला पाण्डें कनादिल । कोभिड १९ विरुद्ध ल्वायेत गुणस्तरीय क्वारेन्टाइन, उपचार व आइसोलेशन व संक्रमितया ज्यान वन धाःसा सिम्हेसिया उचित ब्यवस्थापन समेतया तयारी जुयाच्वंगु वय्कलं कनादिल । सरकारं विदेसं उद्धार यानाः हःगु प्रदेश नम्बर १, २ लगायतया पूर्वी जिल्ला वनीपिं नेपालीयात त्रिभुवन अन्तर्राष्टिय विमानस्थलं ख्वपय् हयाः निश्चित ई तक क्वारेन्टाइनय् तइगु जूगु दु । ख्वपय् नं संक्रमित अप्वया वनाच्वंगु अवस्थाय् तयेगु क्वारेन्टाइनया ब्यवस्था याइगु जूगु दु । आःयात खरिपाटीया नेपाल विद्युत प्राधिकरण व नगरकोटया खानेपानी तालिम केन्द्रय् विश्व स्वास्थ्य संगठनया मापदण्ड कथं सरकारं तयार याःगु ३०८ म्ह क्षमता दुगु क्वारेन्टाइन विदेशं लिहां वइपिं नेपालीतय् लागिं प्रयोगय् हइ । माल धाःसा मध्यपुर थिमिया बोडेय् च्वंगु कृषि विकास केन्द्रय् न्याय्म्ह क्षमताया क्वारेन्टाइन दयेकेगु तयारी याःगु दु । थुकिं नं मगात धाःसा अस्थायी क्वारेन्टाइन दयेकेगु यानाः खुल्ला क्षेत्रया नं पहिचान यानातःगु दु । नगरकोटया होटेलयात क्वारेन्टाइन दयेकेगु सन्दर्भय् धाःसा संघीय सरकारपाखें हे पहल जुयाच्वंगु दु । 

राजमार्गया होटेलय् क्वारेन्टाइन दयेकेगु बारे जूगु सहलहय् होटेल सञ्चालकत सहमत जूसां सरकारं निश्चित शुल्क बीमाःगु उमिगु माग दु । समुदाय स्तरय् कोरोना भाइरसया संक्रमण न्यन धाःसा तत्काल संक्रमितयात तयेत क्वारेन्टाइन व आइसोलेशन कक्ष अप्वयेकेगु तयारी जूगु दु । अथेहे ख्वपय् च्वंगु सरकारी व निजी अस्पतालय् कोभिड १९ या उपचार व आइसोलशन कक्षया ब्यवस्थापन बारे सहलह व तयारी जुयाच्वंगु नं प्रजिअ पाण्डेया धापू दु । जिल्लाया प्यंगुलिं नगरपालिकायात म्होति नं छगः छगः शबबहानया ब्यवस्था यायेत, प्रत्येक नगरपालिकाय् क्वारेन्टाइनया ब्यवस्था यायेत, विदेशय् च्वंपिनि लगत संकलन यायेत पौ छ्वयाः नगर स्तरय् नं तयारी याःगु दु । 

नेपाल रेडक्रस सोसाइटी ख्वप शाखायात नं शबबहानया ब्यवस्था यायेत धाःगु दु । जिल्ला जिललाय् थज्याःगु ब्यवस्थापन मजूगुलिं काभ्रेया धुलिखेल अस्पतालय् कोरोना भाइरस संक्रमणया कारणं ज्यान वंम्ह सिन्धु पाल्चोकया मचाबुम्ह मिसायात ख्वपया सवारी साधन व जनशक्ति वनाः पशुपतिया विद्युतीय शवगृह तक यंकेमाःगु खः । धुलिखेल अस्पतालय् ज्यान वंम्ह सिन्धुपाल्चोकया मिसाया सिम्ह यंकेत सवारी साधन व सिम्ह ब्यवस्थापन ख्वपं वंम्ह तालिम प्राप्त अरुण सैंजू व राजेश गोसाईनं यानादीगु खः । थज्याःगु अवस्थाय् ख्वपय् कोरोना भाइरसपाखें ज्यान वंपिनि सिम्ह ब्यवस्थापन यायेत थनया नगरपालिका व रेडक्रसया छगः शबबहान ब्यवस्था यायेत निर्देशन बिउगु दु । क्वारेन्टाइन तयारीनिसें सिम्ह ब्यवस्थापन यायेत नेपाली सेनाया नेतृत्वय् टोली खटे जुयाच्वंगु दु । नेपाली सेना, नेपाल प्रहरी व सशस्त्र प्रहरी समेतया मंकाः सुरक्षा टोलीं सरकारं खरिपाटीइ दयेकूगु क्वारेन्टाइनया वाः पतिकं सफाई यायेगु व तयारी अवस्थाय् तयेगु सिम्ह ब्यवस्थापनया लागिं तालिम प्राप्त झिंन्याम्हेसिया पुचः तयारी अवस्थाय् तयातःगु बीर दल गण सूर्यविनायकया गणपति व प्रमुख सेनानी शिव पौडेलं कनादिल । महानगरीय प्रहरी परिसर ख्वपया प्रहरी उपरीक्षक सविन प्रधानं कोरोना संक्रमण न्यंके मबीत लकडाउन नापं सिमा नाका कडाई याःगु जानकारी बियादिल । सिमा नाकां अत्यावश्यक व गृह मन्त्रालयया पास बाहेक मेपिंत ख्वपय् दुत मकायागु व सांगा व नाला नाकाय् कडाई याःगुया नापं मेगु सुलासुला वयेफुगु नाकाय् नं निगरानी अप्वयेकागु वय्कलं कनादिल ।  

    

 

Categorized in स्थानिय-समाज