Header Nepal rastra bank Adv

कोरोना रोकथामय् सरकारं स्थानीय तहलिसे समन्वय मयाःगु मेयर शाक्यया द्वपं

नेवा: अनलाइन न्युज – ललेन्द्र शाक्य | २०७८ माघ ६, बिहिबार १६:२५:०४

कोरोना रोकथाम व न्यूनीकरणया नितिं सरकारं स्थानीय तहलिसे समन्वय मयाःगु येँ महानगरपालिका मेयर विद्यासुन्दर शाक्यं द्वपं ब्यूगु दु । मेयर शाक्यं कोभिड १९ या स्वंगूगु लहर रोकथाम व न्यूनीकरणया नितिं सरकार व जिल्ला प्रशासनं छुं नं कथंया समन्वय मयाःगु धाःगु दु ।

सरकारी निर्णय कार्यान्वयन यायेगु मू जिम्मेवारी स्थानीय तहया जूसां नं सरकारं लिपांगु ई कोभिड १९ या सन्दर्भय् याःगु छुं नं निर्णयस महानगरया सल्लाह व सुझाब मकाःगु मेयर शाक्यं द्वपं ब्यूगु दु ।

मेयर शाक्यं धाःगु दु, ‘न्हापा प्रधानमन्त्री, उपप्रधानमन्त्री, विभागीय मन्त्रीपिन्सं जिपिंलिसे सल्लाह याःगु खः । उपत्यका नगरपालिका फोरमया मुँज्याय् मंकाः कथं उगु मुँज्याय् सःतेगु खः । आपालं खँ जिपिंलिसे सहलह ब्याकीगु खः । समस्या छु खः ? उकिया समाधान यायेगु छु खः ? च्वय् पाखें निर्णय जुइ । निर्णय कार्यान्वयन यायेगु क्वय् हे जुइ । थन छुं जुल धाःसा च्वय् च्वंगु लेभलया सुं नं मालीमखु । म्हिगः कोरोनापाखें देसयात बचेयायेत व मुक्कं स्वनिगःयात बचेयायेत, महानगर बचेयायेत जिमिसं थःथःगु थासं क्रियाशीलता क्यना । उकिया हुनिं आपालं न्यून जक क्षति जुल ।’

Categorized in स्थानिय-समाज