नेवा: अनलाइन न्युज – ललेन्द्र शाक्य | २०७७ भाद्र ६, शनिबार १२:२३:१५

विश्व स्वास्थ्य संगठनया प्रमुख टेड्रोस घेब्रेयससं कोरोना भाइरसया महामारी निदँया दुने अन्त जुइगु विश्वास काःगु दु । वं थ्वसिबें न्ह्यः थ्व महामारी गुबलें अन्त मजुइगु धकाः ब्यूगु अभिव्यक्तिसिबें थुगुखुसि ब्यागलं धापू सार्वजनिक जूगु दु ।

शुक्रवाः जेनेभाय् न्वःवासें घेब्रेयससं निदँया दुने हे महामारी अन्त जुइगु विश्वास कायेगु झ्वलय् स्पेनिस फ्लूया उदाहरण ब्यूगु खः ।

सन् १९१८ स खनेदूगु उगु महामारी निदँया दुने अन्त जूगु खः । आःया प्रभावकार िप्रविधिं निदँ नं मतुइगु घेब्रेयससया विश्वास दु ।

विश्व स्वास्थ्य संगठनया प्रमुखं कोरोना भाइरसया तिथि क्वःछिनाः अन्त जुइगु विश्वास यानाच्वंगु इलय् हलिंन्यंकं कोभिड १९ या भ्याक्सिन धमाधम विकास जुयाच्वंगु दु ।

रुसं भ्याक्सिन विकास यानाः दर्ता यायेधुंकूगु दु । अमेरिका, युरोप, चीन, भारत लिसेंया देसं भ्याक्सिन परीक्षण यानाच्वंगु दु । थुकियात हे दृष्टिगत यानाः घेब्रेयससया लिपांगु धापू वःगु खनेदु ।

घेब्रेयससं विगतय् भ्याक्सिन जादुगरया कथि जुइमफइगु अभिव्यक्ति ब्यूगु खः । वं भ्याक्सिन वयेधुंकाः महामारी अन्त जुइगुलि ढुक्क मजुइत धाःगु खः । थुलि तककि संक्रमण गुबलें नं अन्त मजुइगु धायेधुंकाः ग्याःचिकु अप्वःगु खः ।

विश्व स्वास्थ्य संगठनया गतिविधि इलय् ब्यलय् विवादय् लाइगु जुयाच्वंगु दु । अमेरिकी राष्ट्रपति डोनाल्ड ट्रम्पं संगठनलिसेया स्वापू रद्द हे याःगु दु । वं संगठनयात चीनया स्वार्थ कथं चलेजूगु द्वपं तकं ब्यूगु दुसा अमेरिका बियाः वयाच्वंगु फण्ड हे पनाब्यूगु दु ।

छखे संगठन विवादय् लानाच्वंगु दुसा मेखे संगठनया प्रमुख घेब्रेयससया कोभिड १९ महामारीबारे अःखः धापूत सार्वजनिक जुयाच्वंगु दु ।

न्ह्याग्गु न्ह्यात्थे जूसां नं कोरोना महामारी निदँया दुने अन्त जुइगु विश्वास लिसेया धापू सार्वजनिक जूगु अर्थपूर्ण रुपं काःगु दु । थुकिं हलिंया न्हूगु आशा जागृत जूगु दु । हलिंन्यंकं १६० गू सिबें अप्वः भ्याक्सिन विकास जुयाच्वंगु, २५ गू मानव परीक्षणया क्रमय् दूगु व स्वंगूगु चरणया मानव परीक्षणय् दूगुलिं न्हूगु आशा जागृत जूगु दु । वैज्ञानिक आविष्कार व अनुसन्धानं हलिमय् कोरोनायात त्याकीगु संकेतत खनेदयाः वयाच्वंगु दु ।

आःया हे गतिइ भ्याक्सिन विकासय् गम्भीरता हासिल जुयाः सफलता प्राप्त जूसा सन् २०२१ द्युने हलिंपाखें कोरोना भाइरसया महामारी अन्त जुइफु । हलिंया न्यागू कम्पनी भ्याक्सिन विकासय् सफलतापाखे थ्यंगु दु । इमिसं थुगु हे दँ उत्पादन न्ह्याकाः छ्यलाबुला यायेगु तयारी जुइधुंकूगु दु ।

रुसी भ्याक्सिन वइगु वाःपाखें हलिंया थीथी देसय् तकं छ्यलाबुला जुइत्यंगु दु । भ्याक्सिनया पहुँच हलिंन्यंकं सुनिश्चित यायेगु तत्परता तकं क्यंगु दु । थथे आः महामारी अन्तया संकेतत खनेदयाः वयाच्वंगु दु ।

मानवं न्ह्यात्थेजाःगु हाथ्याया नं डटेजुयाः सामाना याइगु व थःगु अस्तित्वया रक्षा यानाच्वनीगु सन्देश थुगुखुसि प्रवाह जुइगु खनेदूगु दु । हलिं पुलांगु हे लयस लिहाँवइगु व आर्थिक व सामाजिक जीवन चलायमान जुइगु संकेत नं खनेदयाः वयाच्वंगु दु ।

Categorized in अन्तर्राष्ट्रिय