kmc bidya

कोरोना महामारी : विश्व बैंकं घोषणा यात १२ अर्ब डलर ग्वाहालि

नेवा: अनलाइन न्युज | २०७६ फाल्गुण २२, बिहिबार १२:०९:४७

विश्व बैंकं नोभेल कोरोना भाइरस (कोभिड–१९) या लिच्वः न्यूनीकरण यायेत १२ अर्ब अमेरिकी डलरया आपतकालीन ग्वाहालि यायेगु घोषणा याःगु दु । विकासशील राष्ट्रया नितिं थ्व ग्वाहालि फास्ट ट्रयाकपाखें उपलब्ध याकेगु बैंकं जानकारी ब्यूगु दु ।

नोभेल कोरोना भाइरस आःतक ६० गूसिबें अप्वः देसय् ब्वलनेधुंकूगु दु । थुकिं अर्थतन्त्रय् नकारात्मक लिच्वः लाकेगु सुरु याःगु परिप्रेक्ष्यय् विश्व बैंकं प्रारम्भिक रुपं घोषणा याःगु १२ अर्ब अमेरिकी डलर आपतकालीन ग्वाहालि स्वास्थ्य समस्या व आर्थिक लिच्वःलिसे ल्वायेत खर्च याइगु जूगु दु । थ्व ग्वाहालि महामारीया लिच्वः न्यूनीकरण यायेत डिजाइन याःगु खः । फास्ट ट्रयाक प्याकेज अन्तगृत विश्व बैंकं स्वास्थ्य प्रणाली सुधार, स्वास्थ्य सेवाय् बांलाःगु पहुँच, महामारपिाखें सुरक्षा, ल्वय् प्रकोपया निगरानी बृद्धि, जनस्वास्थ्य सुधार व नीजि क्षेत्रलिसेया सहकार्यस आर्थिक लिच्वः न्यूनीकरणया क्षेत्रय् ज्या याइगु न्ह्यथनातःगु दु ।

राष्ट्रिय आवश्यकता कथं विश्व बैंकं अन्तर्राष्ट्रिय विकास संघ (आइडीए), पुनःनिर्माण व विकासया नितिं अन्तर्राष्ट्रिय बैंक (आईबीआरडी) व अन्तर्राष्ट्रिय वित्त निगम (आईएफसीं) थःथवय् छप्पं जुयाः ज्या याइ ।

१२ अर्ब अमेरिकी डलर ग्वाहालि मध्ये ८ अर्ब न्हूगु ग्वाहालि रकम खः । ल्यंदूगु ४ अर्ब विश्व बैंक व आईएफसीया विद्यमान पोर्टफोलियोयात पुनःप्राथमिकीकरण याःगु खः । २.७ अर्ब अमेरिकी डलर आईबीआरडीपाखें, १.३ अर्ब आइडीए व २ अर्ब अमेरिकी डलर विश्व बैंकं विद्यमान पोर्टफोलियो दुने हे पुनःप्राथमिकीकरण याःगु खः । अन्तर्राष्ट्रिय वित्त निगमं परिचालन जुइगु ६ अर्ब मध्ये २ अर्ब विद्यमान व्यापार सहजीकरण सम्बन्धी ग्वाहालि खःसा ल्यंदूगु न्हूगु ग्वाहालि खः । थ्व ग्वाहालि अन्तर्गत विश्वव्यापी विशेषज्ञता व राष्ट्रिय ज्ञान व अनुभवयात नीतिगत सुझाव प्राविधिक ग्वाहालि अन्तर्गत छ्यलीगु नं जुइफु ।

विश्व बैंकया नायः डेभिज मल्पासं विकासशील राष्ट्रं नोभेल कोरोना भाइरसया प्रकोप व लिच्वःलिसे ल्वायेत आवश्यकता कथं सहायता कायेफइगु धाःगु दु ।

विश्व बैंकया नायः मल्पासं धाःगु दु, “थ्व आपतकालीन ग्वाहालि खः । संकटलिसे ल्वायेत विश्व बैंकं नीतिगत सुझाव, प्राविधिक ग्वाहालि व विशेषज्ञताया छ्यलाबुला यानाः सम्बन्धित राष्ट्रयात ग्वाहालि याइ ।”

थ्व प्याकेजय् आईटीएया पाखे. न्यून आय दूगु मुलुकय् अनुदान, सहुलियत ऋण समावेश दु । आईबीआरडीया ग्वाहालि मध्यम आय दुपिं मुलुकय् ऋणया रुपं फास्ट ट्रयाकं प्रदान याइ । विश्व बैंक समूह अन्तर्गतया नीजि क्षेत्र स्वइगु अंग आईएफसीं नीजि क्षेत्रयात संचालन व रोजगारी कटौती जुइके मबिइत ग्वाहालि प्रदान याइ ।

(अन्नपूर्ण पोष्ट न्हिपौपाखें)

Categorized in पत्रपत्रिका