nepal investment baink

कोरोना महामारी झन् भयावह : न्हिथं ६ लखसिबें अप्वः संक्रमित थप

नेवा: अनलाइन न्युज – ललेन्द्र शाक्य | २०७७ मङ्सिर ११, बिहिबार ११:२७:३२

हलिंन्यंकं कोरोना भाइरसया संक्रमितया ल्याः ६ करोड ७ लख थ्यंगु दु ।

सीपिनिगु ल्याः १४ लख २६ हजार पुलेधुंकूगु दु । वंगु २४ घौ दुने ६ लख कोरोना संक्रमित थप जूगु दु । न्हिथं ६ निसें ७ लख कोरोना संक्रमित थप जुइधुंकाः अवस्था झन् भयावह जूगु दु ।

लिपांगु तथ्यांक कथं संक्रमित ल्याः ६ करोड ७ लख १९ हजार थ्यंगु दु । वंगु २४ घौ दुने १२ हजारया कोरोना संक्रमणपाखें ज्यान वंगु दु ।

हलिंन्यंकं मुक्कं सक्रिय कोरोना संक्रमितया ल्याः १ करोड ७२ लख थ्यंगु दु । गुगुमध्ये ४ करोड २० लख संक्रमणमुक्त जूगु दु ।

दकले अप्वः अमेरिकाय् १ करोड ३१ लख कोरोना संक्रमित जुइधुंकूगु दु । गुगुमध्ये २ लख ६८ हजार मनूत सीधुंकूगु दु । अमेरिकाय् न्हिथं २ लखया दरं संक्रमित ल्याः अप्वयाच्वंगु दु । सीपिनिगु ल्याः नं न्हिथं २ हजारबिसें अप्वः जुयाच्वंगु दु ।

भारतय् ९२ लख संक्रमितमध्ये १ लख ३५ हजार मनूत सीधुंकूगु दु । ब्राजिलय् ६१ लख संक्रमितमध्ये १ लख ७० हजार मनूत सीधुंकूगु दु ।

यूरोपया देसतसें संक्रमित व सीपिनिगु ल्याखय् मेमेगु देसयात धमाधम ल्यूने लाकाः हयाच्वंगु दु । फ्रान्सय् २१ ल्ख ७० हजार संक्रमितमध्ये ५० हजार मनूत सीधुंकूगु दु ।

रुसय् २१ लख संक्रमितमध्ये ३७ हजार मनूत सीधुंकूगु दु । स्पेनय् १६ लख संक्रमितमध्ये ४४ हजार मनूत सीधुंकूगु दु । बेलायतय् १५ लख कोरोना संक्रमितमध्ये ५६ हजार मनूत सीधुंकूगु दुसा इटलीइ १४ लख संक्रमितमध्य् ५२ हजार मनूत सीधुंकूगु दु ।

नेपालय् कोरोना संक्रमणपाखें सीपिनिगु ल्याः १३ सय ८९ म्ह थ्यंगु दु । आःतक २ लख २६ हजार २६ म्ह संक्रमित जुइधुंकूगु दु ।

Categorized in अन्तर्राष्ट्रिय