coved ad

कोरोना : न्हूगु भेरियन्ट खतरनाक जूगु हुनिं अमेरिकाया न्युयोर्कय् संकटकाल घोषणा

नेवा: अनलाइन न्युज – ललेन्द्र शाक्य | २०७८ मङ्सिर १२, आइतबार ११:०६:१४

अमेरिकाया न्युयोर्कय् संकटकाल घोषणा याःगु दु । न्युयोर्कया गभर्नर काथी होचुलं राज्यन्यंकं संकटकाल लागू जूगु घोषणा याःगु अधिकारीपिन्सं जानकारी ब्यूगु दु ।

कोरोना भाइरसया महामारी अप्वयाः वःगु व कोरोना भाइरसया न्हूगु भेरियन्ट अझ खतरनाक जूगु लिसेंया हुनिं संकटकाल लागू यायेमाःगु गभर्नर होचुलं स्पष्ट याःगु दु । गर्भनरं धाःगु दु, ‘लिपांगु इलय् कोरोना भाइरसपाखें संक्रमित जुयाः अस्पताल भर्ना जूपिनिगु ल्याः अप्वःगुलिं थप महामारी ब्वलंके मबिइगु नितिं संकटकाल लागू याःगु खः ।’

कोरोना भाइरस लिपांगु इलय् छम्हेसिगुपाखें मेम्हेसिके सरेजुइगु क्रम नं तीव्र खनेदूगुलिं थप चिन्तित याःगुलिं सतर्कता छ्यलेमाःगु वया धापू दु । आः घोषणा याःगु संकटकाल वइगु सन् २०२२ या जनवरी १५ तक लागू जुइगु व माःकथं ताःहाकः नं जुइफूगु गभर्ननरं स्पष्ट याःगु दु ।

शुक्रवाः बहनी निर्देशन जारी यासें गभर्नरं संकटकाल लागू यायेधुंकाः अस्पतालया क्षमता बृद्धिइ नं सरकारं ज्या याइगु जानकारी ब्यूगु दु । अथेहे, खोपया छ्यलाबुलायात नं विस्तार व बृद्धि यायेगु गभर्नरं धाःगु दु । दक्षिण अफ्रिकाय् न्हूगु कोरोना भाइरसया रुपं ओमिक्रिन कोरोना भाइरस ब्वलन धैगु सुचंया आधारय् पूर्वसतर्कता कथं नं न्युयोर्कय् संकटकाल घोषणा याःगु अधिकारीपिन्सं जानकारी ब्यूगु दु ।

न्युयोर्कलिसें अमेरिकां मेमेगु राज्ययात नं उच्च सतर्कता छ्यलयेत व प्रतिबन्धात्मक व्यवस्थात लागू यायेत आह्वान याःगु दु । अथेहे, बेलायत, क्यानडा लिसेंया आपालं युरोपेली मुलुकयात तकं विदेशं वइपिं यात्रुपिनिगु प्रवेशय् कडाइ यायेत सुझाब ब्यूगु दु ।

Categorized in अन्तर्राष्ट्रिय