कोरोना खनाः ग्यात नुगःचु ल्वगि अर्थमन्त्री खतिवडा : क्याबिनेट बैठकय् मवन ग्यानाः
नेवा: अनलाइन न्युज – ललेन्द्र शाक्य | २०७७ भाद्र १५, सोमबार ११:५१:३७
अर्थमन्त्री डा. युवराज खतिवडा आइतवाः सनिलय् च्वंगु मन्त्रिपरिषद बैठकय् उपस्थित मजुल । न्हिच्छि अर्थ मन्त्रालयय् हे दुम्ह मन्त्री खतिवडा बालुवाटारया बैठकय् खनेमदये धुंकाः गुलिखे मन्त्रीपिन्सं खासखुस याःगु खःसा अर्थमन्त्री खतिवडायात कोरोनां जकं थिलकि धैगु न्ह्यसःचिं तकं ब्वलंगु खः ।
मन्त्री खतिवडायात कोरोनां थ्यूगु धाःसा मखु, कोरोना खनाः ग्याःचिकुइ जक लाःगु खः । बैठकय् उपस्थित मेमेपिं मन्त्रीपाखें थःत कोरोना संक्रमण जुइला धैगु ग्याःचिकुया हुनिं मन्त्री खतिवडा बालुवाटार मवंगु खः ।
मन्त्री खतिवडा बैठकय् मवःगुया हुनि बारे मेम्ह छम्ह मन्त्रीं धाःगु दु, आइसोलेसनय् च्वनावःम्ह ईश्वर पोखरेल व रामबहादुर थापा बादल नं म्हिगः आइतवाः सनिलया बैठकय् मवल । उकिं कोरोनां ज्वनीगु ग्याःचिकुं यानाः इपिं मवःगु धकाः सीदत ।
तर, क्याबिनेट बैठकय् सहभागी मजूसां नं अर्थमन्त्री खतिवडा अर्थ मन्त्रालयस धाःसा नियमित उपस्थित जुयाः ज्या यानाच्वंगु दु । थौं सोमवाः नं व सदांथें सुथय् ८ ता इलय् हे अर्थ मन्त्रालय थ्यंकूगु दु । न्हिथं मन्त्री खतिवडा सुथंनिसें सनिलतक मन्त्रालयया ज्याय् हे खटेजुयाच्वंगु दु ।
मन्त्री खतिवडा स्वास्थ्यया ल्याखं कोरोनाया उच्च जोखिम दुम्ह व्यक्ति खः । व नुगःचु (मुटु)या ल्वगि खः । सुगर व प्रेसरया ल्वगि जूगु हुनिं खतिवडां स्वास्थ्यय् विशेष सतर्कता छ्यलाः वयाच्वंगु दु ।
भाद्र २० गते कार्यकाल क्वचाइगु
अथे ला मन्त्री खतिवडाया पदावधि तकं आःया न्यान्हु लिपा अर्थात् भाद्र २० गते क्वचायेत्यंगु दु । मन्त्री खतिवडा सांसद पदय् मदुगुलिं हे मन्त्री जूगु २० गते ६ महिना थ्यनीगु जूगुलिं वयां लिपाः स्वतः मन्त्री पदं पिहाँ वयेमाःगु जूगु खः ।
सांसद मजूम्ह मनू संविधानकथं ६ महिनासिबें अप्वः मन्त्री जुइदइमखु । थ्वहे दथुइ राष्ट्रियसभाया पूर्वसांसद खतिवडायात हाकनं राष्ट्रियसभाय् मनोनित यानाः अर्थमन्त्रीइ निरन्तरता बिइगु प्रधानमन्त्री केपी शर्मा ओलीया इच्छा दूगु अनौपचारिक चर्चा नं चलेजुयाच्वंगु दु ।
तर, नेकपा दुनेया मेगु पक्ति धाःसा अर्थमन्त्री बहालवाला सांसदपाखें हे दयेकेमाःगु पक्षय् दु । थुकिया नितिं विष्णु पौडेल व सुरेन्द्र पाण्डे लिसेंयापिन्त नेकपा दुने न्हूम्ह अर्थमन्त्रीया दाबेदारया रुपं कयाः वयाच्वंगु दु ।
Categorized in राजनीति