prabhu baink new

कोरोनाया हुनिं होलीपुन्हीनिसें क्वःदःगु पर्व स्वन्तितक लिच्वः लाइगु संकेत

नेवा: अनलाइन न्युज – ललेन्द्र शाक्य | २०७७ आश्विन ४, आइतबार १४:२१:४१

ललेन्द्र शाक्य

कोरोना भाइरस संक्रमणया हुनिं नेपाःया थीथी जात्रा पर्व क्वःदःगु दु ।

सरकारं दकले न्हापां २०७६ चैत्र ११ गतेनिसें न्हापांगु चरणय् लकडाउन याःगु खःसा थौं आश्विन ५ गतेतक थीथी चरण कथं लकडाउन कायम जुयाच्वंगु दनि ।

२०७६ चैत्र ११ गतेनिसें लकडाउन जारी याःगु खःसां कोरोनाया संक्रमण जुइफूगु हुनिं फागुन २६ गतेया होलीपुन्ही मन्याःगु खः ।

थ्वया लिपा फागुन २८ गते नाला करुणामय जात्रा क्वःदलसा चैत्र १० गते पाहाँचःह्रे, चैत्र १२ गते असनय् द्यः ल्वाकीगु जात्रा क्वःदःगु खः ।

येँया नांजाःगु प्यन्हुयंकं जुइगु जात्रा जनबहाःद्यःय रथजात्रा नं कोरोनाया हुनिं क्वःदःगु खःसा चैत्र १६ गते येँया तःजिगु पुन्ही ल्हुतिपुन्ही क्वःदःगु खः ।

अथेहे, बैशाख ११ गते मांया ख्वाः स्वयेगु नखः नं क्वःदःगु खः । थ्वयालिपा ज्येष्ठ १० गते थिमि करुणामय न्हवं जात्रा नं क्वःदल । अथेहे, ज्येष्ठ ३१ गते भलभल अस्तमि व ३२ गते ग्वलया त्रिशुली जात्रा नं क्वःदःगु खः ।

थ्वहे झ्वलय् असार २१ गते न्हापा लिपा तःजिक जुइगु गुन्हुपुन्ही नं थुगुसी थःथःगु छेँय् जक सीमित यानाः न्यायेकेगु ज्या जुल ।

श्रावणया न्हापांगु वाःनिसें नेवाः समुदायया निरन्तर रुपं न्ह्याइगु नखः साउन ३ गते गथांमुखः नखः क्वःदलसा श्रावण ६ गते स्वयम्भुइ लच्छियंकं बौद्ध धर्मावलम्बीपिन्सं बाजं थानाः वनीगु गुलांधर्म पर्व नं क्वःदःगु खः ।

अथेहे, गुंलाया निन्हु लिपा वइगु नागपंचमी नं थुगुसी थीथी नागया नामं नीस्वनातःगु पुखुली छुं नं कथंया ज्याझ्वः मजुल ।

थ्वहे झ्वलय् श्रावण १३ गते यलया पंञ्जरां ज्याझ्वः क्वःदलसा श्रावण २० गते स्वनिगःन्यंकं जुइगु सापारु ज्याझ्वः क्वःदल ।

साउन २१ गते यल देय्या नांजाःगु जात्रा मतयाः क्वःदल । अथेहे, श्रावण २६ गते कृष्णास्तमि क्वःदलसा साउन २८ गते यलया भिन्द्यः जात्रा नं क्वःदल ।

अथेहे, श्रावण ३२ गते येँया पंञ्जरां ज्याझ्वः क्वःदलसा भाद्र १ गते किपूया नांजाःगु जात्रा बाघभैरव जात्रा नं क्वःदल ।

भाद्र ३ गते अबुया ख्वाः स्वयेगु नखः धाःसा न्हापांगु चरणया लकडाउन चिइकाः निक्वःगु चरणया लकडाउन याये छन्हु न्ह्यः लाःगुलिं कोरोना संक्रमणपाखें बचेजुइगु सकतां उपाय् छ्यलाः अबुया ख्वाः स्वयेगु नखः धाःसा जूगु दु ।

थ्वयालिपा भाद्र ४ गतेनिसें हाकनं निक्वःगु चरणया लकडाउन यायेवं भाद्र ५ गते लाःगु हिन्दु मिसापिनिगु तःजिगु पर्व तीज नं थ्व दँय् क्वःदलसा भाद्र ६ गते नेवाः समुदायया चथाः नखः धाःसा थःथःगु छेँय् च्वनाः न्यायेकीगु जूगुलिं कोरोना संक्रमणया लिच्वः मलात ।

निक्वःगु चरणया लकडाउनं यानाः येँया दकले तःधंगु जात्रा येँयाः (इन्द्रजात्रा) क्वःदल ।

छवाःयंकं जुइगु थुगु जात्राया छुं नं कथंया ज्याझ्वः थुगु दँय् मयायेगु निर्णय इन्द्रजात्रा व्यवस्थापन समितिं यानाबिल ।

निक्वःगु लकडाउनया हुनिं भाद्र १८ गतेनिसें न्ह्याःगु सोह्रश्राद्धयात नं लिच्वः लाकलसा नेपाःया हे दकले ताःहाकःगु यलया बुंगद्यःया रथजात्रायात नं बांमलाक्क हे लिच्वः लाकल ।

थथे लकडाउनया हुनिं नेपाःया सकतां जात्रा पर्वय् निरन्तर लिच्वः लालां वनाच्वंगु दुसा आः वइगु मोहनी स्वन्ति नखःतक नं कोरोनाया सन्त्रासं लिच्वः लाकीगु अनुमान यानाहःगु दु ।

थगुसी मलमास लाःगु हुनिं मच्छेनारायण मेला न्ह्वानाच्वंगु दुसां न्हापा लिपाथें उलि भक्तजनपिं वयाच्वंगु मदु ।

स्वनिगःन्यंकं थुकथं हे कोरोना संक्रमित ल्याः न्हियान्हिथं अप्वयाः वन धाःसा याकनं हे वयेत्यंगु नखः कार्तिक १ गते नलास्वाँ पिइगु, कार्तिक ५ गते पचली भैलःद्यः जात्रा, कार्तिक ८ गते कुछिभ्वय्, कार्तिक १० गते मोहनी व थ्वयालिपा कार्तिक ३० गते लक्ष्मीपूजा व मंसीर १ गते म्हपूजा तक नं न्यायेकेगु स्थिति मदइगु संकेत क्यनाहःगु दु ।

निक्वःगु लकडाउन लिपा सरकारं आःतक भेला, जुलुस, जात्रा पर्व, नखःचखः, धार्मिक थाय् व थीथी लागा बन्द यानातःगु दनि ।

Categorized in नेवाः