prabhu baink new

कोरोनाया हुनिं लानाच्वंगु लिच्व:या विषयस यलय् सहलह

नेवा: अनलाइन न्युज – विजयरत्न | २०७७ श्रावण २५, आइतबार १४:२७:०५

विश्वव्यापि महामारीया रुपय् न्यंक्कभनं ब्वलनाच्वंगु कोरोनाया हुनिं स्वनिगलय् लानाच्वंगु लिच्वःया विषयस यलय् सहलह जुउगु दु ।

यलया मङ्गलबजारय् म्हिगः शनिवाः नेवाः ग्वाहालि पुचः हःखाःया  ग्वसालय् जुउगु ...कोरोनाया खसुइ तनाच्वंगु स्वनिगः...  शिर्षकया ज्याझ्वलय् मू वक्ता सामाजिक अभियन्ता एवं विकासविज्ञ अनिल चित्रकारं मनूतयसं प्रकृतिइ याःगु अतिक्रमणया परिणाम स्वरुप हे थथे थीथी भाइरसया प्रकोप अप्वयाः वःगु खः धकाः धयादिल ।

वरिष्ठ साहित्यकार एवं समाजसेवी व हलिं नेवाः दबू नेपाः च्याप्टरया नायः शाक्य सुरेनं सञ्चालन यानादीगु उगु ज्याझ्वलय् भौतिक दूरी कायम जुइकथं फेतुइगु थाय् तःगु खःसा सकसित मास्क व स्यानिटाइजर नं बिउगु खः ।

ज्याझ्वलय् खलःया नायः विक्रम शाक्य, इनफ इज इनफ अभियानया अभियन्ता विनोद शाही, नेवाः राजनीतिक अभियानया पुलांम्ह नायः रबिन्द्र श्रेष्ठ, साहित्यकार अर्थविद् एवं राजनैतिक विश्लेषक डा. पुष्पराज राजकर्णिकार, साहित्यकार एवं समाजसेवी कुमुद श्रेष्ठ लगायतं थःथःगु विचाः प्वंकादीगु खः ।

Categorized in नेवाः