नेवा: अनलाइन न्युज – ललेन्द्र शाक्य | २०७७ भाद्र ६, शनिबार १०:५५:२९

नेपाल कम्युनिष्ट पार्टी दुनेया विवाद थ्यंमथ्यं अन्त जूगु दु । नेकपा नायः पुष्पकमल दाहाल प्रचण्ड, बरिष्ठ नेतापिं माधवकुमार नेपाल व झलनाथ खनाल प्रधानमन्त्री केपी शर्मा ओलीया राजीनामा मागया अडानपाखें लिचिले धुंकाः विवाद थ्यंमथ्यं अन्त जूगु खः । विवाद अन्त धुंकाः प्रधानमन्त्री ओलीं मन्त्रिमण्डल पुनर्गठनया तयारी याःगु दु । ओलीं मन्त्रिमण्डल पुनर्गठन व सुं सुं मुख्यमन्त्रीपिं हिलाबुला यानाः न्यादँ कार्यकाल सुनिश्चित यायेगु रणनीति दयेकूगु दु ।

प्रम ओलीं विवाद समाधानया खाका दयेकेत महासचिव विष्णु पौडेलया संयोजकत्वय् छगू कार्यदल दयेकाः सचिवालयपाखें अनुमोदन तकं याःगु दु । कार्यदलय् दुपिंमध्ये आपालं ओलीया आपालं आलोचना यानाच्वंपिं आलोचकपिं खः । गुपिंमध्ये स्थायी कमिटी दुजः भीम रावल नं खः ।

सुरेन्द्र पाण्डे, जनार्दन शर्मा, पम्फा भुषाल नं ओलीया आलोचक खः । शंकर पोखरेल ओलीया प्रियपात्र खः । आः थुपिंमध्येपाखें आपालं मन्त्री जुइगु चर्चा जुयाच्वंगु दु । विरोधीपिन्त चुप याःम्ह ओलीं मन्त्रीया आशा क्यनाः छप्पं जूपिं राजीनामा पक्षधरपिन्त तितरबितर तकं याःगु दु ।

नेकपा दुने मन्त्रिमण्डल पुर्नगठनया तयारीलिसे ओलीया विरोध याइपिं चुपचाप जूगु दु । गुलिंसिनं ओलीयात चित्त मस्याकेगु बरु वया लिक्कलाःपिं लिसे नापलानाः मन्त्री जुइगु चाहना प्वंकेगु ज्या यानाहःगु दु । मन्त्री जुइगु लबिंग आपालं चलेजुयाच्वंगु दु ।

थुगुखुसि नायः प्रचण्ड, बरिष्ठ नेतापिं माधवकुमार नेपाल व झलनाथ खनालया अलावा न्वकू बामदेव गौतमं तकं कोटा कायेखनीगु जूगु दु । इमिगु कोटापाखें मन्त्री जूसां नं ओलीया समर्थन विना असम्भव जुइ । उकिं इपिं गुटय् मिलेयानाः ओलीया साथ नं मालेत पलाः न्ह्याकाच्वंगु दु ।

प्रचण्ड थःगु पक्षपाखें मन्त्री जूम्ह रामबहादुर थापा बादल व लेखराज भट्टया बर्हिगमन चाहेजुयाच्वंगु दु । इमिसं मछिंगु अवस्थाय् साथ मब्यूगु धासें प्रचण्डं थःगु कोटाय् मलाकेगु विश्वस्त स्रोतं जानकारी ब्यूगु दु । बरु पम्फा भुषालयात मन्त्री दयेकेत प्रचण्ड तयार जूगु खनेदूगु दु ।

माधव नेपालं योगेश भट्टराई व घनश्याम भुषालयात साथ मबिइगु सीदूगु दु । निम्हेस्यां थःत साथ मब्यूगु धासें आः मन्त्रीया नितिं मेमेपिनिगु नां यंकेगु नेपालया तयारी दु । वया कोटापाखें भीम रावल व सुरेन्द्र पाण्डेया सम्भावना बल्लाःगु दु । झलनाथ खनालं नं सुरेन्द्र पाण्डेयात साथ ब्यूगुलिं वया सम्भावना बल्लाःगु दु ।

बामदेव गौतमं योगेश भट्टराई व घनश्याम भुषालयात निरन्तरता बिइमाःगु प्रस्ताव यंकेगु तयारी याःगु दु । वयात नं राष्ट्रियसभाय् यंकाः मन्त्री जुइत प्रस्ताव दु । तर, कानूनी अड्चन वइगु जूगुलिं गौतम पार्टीया ज्या यायेगु पक्षय् दु । गौतमया कोटापाखें वया जहान तुलसा थापा नं मन्त्री जुइगु सम्भावना बल्लानाः च्वंगु दु ।

मन्त्री जुइगु दौडधुप न्ह्यानाच्वंबलय् ओलीं अझ नं छुं ई काइगु सीदूगु दु । कार्यदलया खाकापाखें फुक्क खँ मिलेयानाः न्यादँ प्रधानमन्त्री जुइगु सुनिश्चित जुइधुंकाः जक ओलीं पुर्नगठन याइगु सीदूगु दु ।

मुख्यमन्त्रीइ नं छम्ह या निम्हेसिगु हिलाबुला जुइफइगु सीदूगु दु । ३ नम्बर प्रदेशया मुख्यमन्त्री डोरमणि पौडेलया पलेसा अष्टलक्ष्मी शाक्यया सम्भावना बल्लाःगु दु । प्रदेश १ य् नं शेरधन राईया पलेसा भीम आचार्य वयेफूगु सम्भवाना दु । थथे ओलीं माधव नेपाल व झलनाथ खनाल निम्हेसित चुप यायेगु तयारी याःगु दु ।

Categorized in राजनीति