prabhu baink new

कोरोनां सुरक्षित जुइत थःम्हं हे कुतः यायेमा : येँया मेयर विद्यासुन्दर शाक्य

नेवा: अनलाइन न्युज – विजयरत्न | २०७७ श्रावण २५, आइतबार ११:१८:४०

येँ महानगरपालिकाया मेयर विद्यासुन्दर शाक्यं आःया संक्रमणया इलय् आम सर्वसाधारण थः हे सचेत मजुइगु खःसा सरकारं याये धयां नं कोरोना नियन्त्रण यायेमफइगु धयादीगु दु ।

येँ महानगरपालिका वडा ल्याः २५ या श्रीघः बहाःस्थित धर्मकीर्ति विहारय् बौद्ध परियत्ति शिक्षाय् ताःलाःपिं ब्वनामिपिन्त सिरपाः  लःल्हायेगु छगू ज्याझ्वलय् न्वःवासें येँ महानगरपालिकाया मेयर शाक्यं पीसीआर परीक्षण यायेमाल धकाः अनसन च्वनाः हुलमुल याःबलय् बरु वहे हुलं संक्रमण न्यनीगु खतरा अप्वःगु धयादिल ।
 
पीसीआर परीक्षण थकायेवं तुं संक्रमण नियन्त्रण जुइगु मखसे सरकारं जारी याःगु स्वास्थ्य मापदण्ड पालना यायेगुया विकल्प मदुगु वयकःया धापू खः । पीसीआर धइगु कोरोना संक्रमणया वासः मखू व ला परीक्षण जक खः धकाः धयादिसें पीसीआर परीक्षणय् प्रतिव्यक्ति १० द्वः तका खर्च जुइगु व परीक्षणयात माःगु सकतां ज्वलं विदेशं हयेमाःगु मेयर शाक्यया धापू खः ।

आः थन पीसीआर परीक्षण यानाः झी गनं वन व अन हे संक्रमितया स्वापुतिइ वल धाःसा कोरोना पुनेफुगु खँ नं मेयर शाक्यं कनादीगु दु ।
 
लकडाउनया इलय् स्वनिगलय् दुमकाः धकाः याःगु आलोचना लुमंकुसें मेयर शाक्यं लाक्वपाक्व मनूत स्वनिगः दुकायेबलयया लिच्वः आः खनेदयाच्वंगु धयादिल ।
 
पिनें मनूत दुकाःबलय् थन संक्रमण अप्वयावःगु व थज्याःगु इलय् जुलुस पिकायेगु ज्या जूबलय् वहे जुलुसं संक्रमण न्यनीगु ग्याःचिकु नं अप्वःगु वयकलं धयादिल ।
 
उगु ज्याझ्वलय् शाक्यं येँ महानगरपालिका वडा ल्याः २५ या श्रीघःस्थित धर्मकीर्ति विहारय् वौद्ध परियत्ति शिक्षाया ब्वनामिपिन्त सिरपाः लःल्हानादीगु ख ।

महानगरपालिकापाखें उगु विहारयात वौद्ध परियति शिक्षाया निंतिं न्यागू लख तका दां ग्वाहालि याःगु खः ।
 
उगु इलय् मेयर शाक्यं येँ नगर दुने दुगु बुद्ध बिहारया मूल भवन, लुम्बिनीया बज्रयान महाविहार, जनबहाःद्यःया दिगिछेँ, स्वयम्भूस्थित भजनछेँ नापं दुगु विहार, स्वयम्भूस्थित आनन्दकुटी विहार, किम्डोलस्थित आनन्दभुवन विहार, वानेश्वरस्थित अन्तर्राष्ट्रिय बौद्ध भावना केन्द्र दयेकेत ग्वाहालि यानाच्वनागु जानकारी नं बियादिल ।

Categorized in नेवाः