kmc bidya

कोरोनां विश्व कासा क्षेत्रय् धक्का, दर्जनौं कासा स्थगित

नेवा: अनलाइन न्युज | २०७६ फाल्गुण २९, बिहिबार १२:०६:१८

थुगु दँ जुइमाःगु थीथी कासाय् लिच्व: लाःगु दु । कोरोना भाइरसया हुनिं अन्तर्राष्ट्रियस्तरया दर्जनौं कासात स्थगित जूगु दु । समग्र कासा क्षेत्र व कासामिपिनिगु नितिं थुगु दँ दुःखद जुइगु जूगु दु ।

कोरोनाया ग्याःचिकुया हुनिं फुटबलया च्याम्पियन्स लिग, स्पेनया लालिगा व इङ्ल्याण्डया प्रिमियर लिगय् लिच्वः लाःगु दु । अथेहे, इटलीया सिरी ए नं लिच्वः लाःगु दु । गुलिखे कासात बन्द रंगशालाय् दर्शक विना म्हितकूगु दुसा आपालं कासात स्थगित हे याःगु दु । फुटबल बाहेक मेमेगु विधाया कासात नं धमाधम स्थगित याःगु दु ।

विश्व एथ्लेटिक्स इन्डोर च्याम्पियनसिपय् सन् २०२१ तकया नितिं स्थगित जूगु दु । मार्च १३ निसें १५ तक नानजिङय् जुइगु धाःगु कासा २०२१ इा नितिं लिछ्याःगु दु । अथेहे, उत्तर कोरियां नं पेङयोङ म्याराथनयात स्थगित याःगु दु । अप्रिलय् जुइगु धाःगु उगु कासा नं कोरोनाया हुनिं स्थगित जूगु दु । अथेहे सियोल म्याराथन नं स्थगित जूगु दु ।

दक्षिण कोरियाय् कोरोनाया संक्रमण अप्वयावंगु हुनिं ग्वसाः खलकं सियोल म्याराथन स्थगित याःगु खः । अथेहे, पेरिस हाफ म्याराथन नं स्थगित जूगु दु । फ्रेन्च सरकारं जमघट जुइगु फुक्क ज्याझ्वः रद्द यायेत निर्देशन बिइधुंकाः थ्व कासा नं स्थगित जूगु खः । अथेहे, मार्च १५ स जुइगु धाःगु बार्सिलोना म्याराथन नं अक्टोबरतकया नितिं लिछ्याःगु दु । ब्याटमिन्टय् नं जर्मन ओपन, भियतनाम ओपन, पोलिस ओपन, ओलम्पिक छनोटया कासात फुक्क् स्वास्थ्यया अवस्थाया हुनिं रद्द याःगु दु ।

बक्सिङय् ओलम्पिक छनोटया कासात अन्तर्राष्ट्रिय ओलम्पिक कमिटीं रद्द याःगु दु । उहानय् जुइगु धाःगु उगु कासात आः जोर्डनया अमानय् तःगु दु । तर अन न. कासा जुइगुलि शंका हे ब्वलंगु दु । अथेहे, जापनजि बक्सिङ कमिसनं फुक्क इभेन्टत स्थगित याःगु दु । क्रिकेटय् श्रीलंका टूरया इलय् इंग्ल्याण्डया कासामिं ल्हाः मिलेमयाइगु जूगु दु । कोरोनाया ग्याःचिकुया हुनिं हे दक्षिण अफ्रिकाया कासामिं नं भारतीय कासामिलिसे ल्हाः मिलेमयाइगु जूगु दु ।

फुटबलय् नं चाइनीज फुटबल संघं थ्व सिजनय् फुक्क लिग कासात स्थगित याःगु दु । अथेहे, एएफसीं विश्वकप व एसियन कप छनोटया कासात स्थगित याःगु दु । अथेहे, चाइनीज ग्राण्डपिक्स नं स्थगित जूगु दु ।

बहराईन ग्रापी नं विना दर्शक रेस जुइगु जूगु दु । जापानय् जुइगु टोकिया ओलम्पिकय् नं कोरोनाया लिच्वः लाइगु खनेदु । वइगु जुलाई लिपांगु व अगष्ट न्हापांगु वाः जुइगु धाःगु टोकिया ओलम्पिक निदँ लिपा लिछ्यायेगु तयारी जुयाच्वंगु धाःगु दु ।

Categorized in कासा