kmc bidya

कोरोनां क्रिमसन अस्पतालय् छम्ह मनू सित, सीपिं स्वम्ह थ्यन

नेवा: अनलाइन न्युज – ललेन्द्र शाक्य | २०७७ जेठ ८, बिहिबार १८:२८:५२

नेपालय् कोरोना भाइरसया हुनिं स्वम्हम्ह मनू सीगु दु ।

रुपन्देहीया क्रिमसन अस्पतालय् वासः याकाच्वंम्ह गुल्मीया ४१ दँया मिजं सीगु स्वास्थ्य व जनसंख्या मन्त्रालयं पुष्टि याःगु खःसा मन्त्रालयया प्रवक्ता डा. विकास देवकोटां बिहिवाः सुथय् उम्ह मनू सीगु जानकारी ब्यूगु खः ।

निमावि स्कूलया प्रधानाध्यापक उम्ह मनू जेठ १ गते अस्पतालय् भर्ना जूगु खः । वया सुरुनिसें हे आइसीयू कक्षय् भेन्टिलेटरया ग्वाहालिं वासः जूगु खः ।

कोरोना शंकास्पद खनेदयेधुंकाः जेठ २ गते वया स्वाब कयाः पीसीआर टेष्टया नितिं प्रदेश जनस्वास्थ्य प्रयोगशालाय् छ्वःगु खः । सोमवाः वःगु रिपोर्टय्् वयाके कोरोना पोजेटिभ खनेदूगु खः ।

थ्वसिबें न्ह्यः कोरोना संक्रमणया हुनिं नेपालय् सिन्धुपाल्चोकया २९ दँया मचा बूम्ह मिसा व बाँके नरैनापुरया २५ दँया मिजं सीधुंकूगु दु ।

Categorized in राष्ट्रिय