zero media family planning adv

कोरियाय् २५ लखं रोजगारी गुमेयात, नेपाली नं प्रभावित

नेवा: अनलाइन न्युज – ललेन्द्र शाक्य | २०७७ भाद्र २६, शुक्रबार ११:३३:४०

नेपाःमिपिनिगु नितिं रोजगारीया नितिं आकर्षक गन्तव्य मुलुक दक्षिण कोरियाया श्रम बजाः कोरोना महामामरीया हुनिं बांमलाक्क लिच्वः लाःगु दु । कोरोना महामारी लिपा थ्यंमथ्यं २५ लखया रोजगारी गुमेजूगु दु । वंगु अगष्टय् जक २ लख ७४ हजार रोजगारी गुमेजूगु छगू तथ्यांकं क्यंगु दु ।

तथ्यांक कथं अनया बेरोजगारी दर वंगु अगष्टय् ०.१ प्रतिशतं बृद्धि जुयाः आः ३.१ प्रतिशत थ्यंगु दु । थ्वलिसें वित्तीय संकट ब्वलनाः वंगु अगष्टय् रोजगारी गुमेयाःपिनिगु ल्याः लिपांगु ८ महिना थुखेया उच्च खः ।

थुकिया प्रत्यक्ष असर अन श्रम यानाच्वंपिं नेपाःमिपिंके नं खनेदयावःगु दु । कम्पनीइ ज्या म्हो  जुइधुंकाः अतिरिक्त ज्या मजुइगु, बहनी व न्हिनय् वा मेमेगु सिफ्ट जुइपिनिगु छगू सिफ्ट जक जुइगु, बिदाया दिं चलेजुइगु कम्पनीत नं चलेमजूगु, गुलिखे कम्पनीं बेतलबी बिदाय् च्वनेत वाध्यात्मक अवस्था ब्वलंकूगु, वालय् स्वन्हु वा प्यन्हु जक ज्याय् सःतीगु लिसेंया हुनिं नियमित जुयाच्वंगु आम्दानीइ गिरावट वःगु व इलय् तलब कायेत तकं थाकूगु अन श्रम यानाच्वंपिं नेपाःमिपिनिगु धापू दु ।

अय्सां एनआरएन कोरियाया नायः यज्ञराज सुवेदीं उगु महामारीइ कोरियाय् आम्दानी व ज्या म्हो जूसां नं विदेशी कामदारपिं विशेषयानाः नेपाःमिपिं अझ नं सुरक्षित जूगु धाःगु दु । वं कम्पनी बन्द जुयाः बेरोजगार जुल धाःगु न्यनेम्वाःगु व  म्हो जक जूसां नं आम्दानी जुयाच्वंगु सुखद् खँ जूगु जानकारी ब्यूगु दु ।

कोरियाय् श्रम याइपिं नेपाःपिनिगु भिसा (इ ९) बल्लाःगु व इमित छुं समस्या जूसा श्रम नियम कथं अधिकार कायेत व कम्पन िहिलाःसां नं जूसां रोजगारी बचेयानाः तयेफइगु जूगु हुनिं नेपाःमिपिन्त खास हे चिन्ता मजुइगु वया धारणा दु ।

अनया मझौला व तःधंगु कम्पनीत विशेषयाना वाह्य निर्यातय् निर्भर जुइ । कोरोना महामारीया हुनिं निर्यात म्हो जूबलबय्  उकिया तप्यंक लिच्वः चीधंगु कम्पनी लिसेंयात लाःबलय् अनया श्रम बजारय् अतिकं उथलपुथल खनेदूगु दु ।

Categorized in अन्तर्राष्ट्रिय