zero media family planning adv

कोभिड १९ लकडाउनया लुमन्तिइ : सर्टमूभि ...अकाल...प्रिमियर

नेवा: अनलाइन न्युज – ललेन्द्र शाक्य | २०७७ चैत्र ११, बुधबार १५:३७:५२

कोरोना भाइरस कोभिड १९ लकडाउनया लुमन्तिइ थौं चैत्र ११ गते बुधवाः नेपाली खस भाषाया सर्टमूभि ...अकाल...प्रिमियर शो यानाः सुत्र टिभी यूट्युब च्यानलय् सार्वजनिक याःगु दु । सर्टमूभि ...अकाल...निर्माण पुचलं वंगु दच्छि न्ह्यः २०७६ चैत्र ११ गते मंगलवाःनिसें लकडाउन न्ह्याःगु जुयाः लकडाउन जूगु दच्छि दूगु लुमन्तिइ थौं २०७७ चैत्र ११ गते बुधवाः थुगु ज्याझ्वःया ग्वसाः ग्वःगु खः ।

विशेष रुपं लकडाउनया इलय् यक्व नागरिकपिन्सं भोगेयायेमाःगु सास्ती व समाजया ग्याःचिकु, अस्पतालय् विरामीप्रति चिकित्सकया बेवास्ताया हुनिं अकालं ज्यान गुमेयायेमाःगु विषयवस्तुयात कःघानाः चेतनामूलक व शिक्षामूलक कथं सर्टमूभि ...अकाल...निर्माण यानातःगु दु ।

सर्टमूभि ...अकाल... किपूया ३ वडा खासीबजारय् च्वंगु मेलवर्न रेष्टुरेन्टय् छगू विशेष ज्याझ्वःया दथुइ प्रिमियर शो यानाः सार्वजनिक याःगु खः ।

किपू नगरपालिका १० वडाया वडाध्यक्ष लिसें किपूया छम्ह लोकंह्वाःम्ह नांजाःम्ह ख्यालिन्हिलि कलाकार अमन महर्जनया मूपाहाँसुइ व दिग्गज निर्देशक कलाकार लिसें संगीतकःमि रामकृष्ण खड्गीया विशेष पाहाँसुइ सर्टमूभि ...अकाल...प्रिमियर शो सार्वजनिक ज्याझ्वः जूगु खः । मूपाहाँ महर्जन व विशेष पाहाँ खड्गीं मंकाः कथं प्ले बटन तियाः उलेज्या यानादीगु खः ।

सर्टमूभि ...अकाल...या क्यामेरा पर्सनलिसें सम्पादक व निर्देशक रक्की महर्जनया सभानायःसुइ न्ह्याःगु उगु प्रिमियर शो सार्वजनिक ज्याझ्वलय् स्क्रीप्ट च्वमिलिसें संवाद च्वमि व परिकल्पनाकार राज महर्जन नं दबुली उपस्थित जुयादीगु खः ।

सर्टमूभि ...अकाल...या कलाकारलिसें प्राविधिक व ग्वाहालिमिपिन्त मूपाहाँ किपू १० वडाया वडाध्यक्ष अमन महर्जन मतिनाया चिं लःल्हानादीगु खःसा विशेष पाहाँ निर्देशक कलाकार संगीतकःमि रामकृष्ण खड्गीं खादा न्ययेकाः हनेज्या यानादीगु खः ।

सर्टमूभि ...अकाल...प्रिमियर लिपा नुगःखँ तसें विशेष पाहाँ खड्गीं समग्र रुपं सर्टमूभि ...अकाल...उत्कृष्ट जूगु धासें नेपाली खस भाषाया सर्टमूभि जूगुलिं तच्वकं धेंधेंबल्ला यायेमालीगु जुयाः निर्माण पक्षयात छुं कमी कमजोरी दुसा भिंकेत इनाप यानादीगु दु । वय्कलं लकडाउनया ईया यथार्थ घटनायात दुग्यकं न्ह्यब्वयेत सर्टमूभि ...अकाल...ताःलाःगु व निर्माण पुचलं आपालं मेहनत यानातःगु खँ न्ह्यथनादिल ।

अथेहे, नुगःखँ तयेगु झ्वलय् मूपाहाँ किपू १० वडाया वडाध्यक्ष अमन महर्जनं सर्टमूभि ...अकाल...थःगु हे घटनाथें ताःगु खँ न्ह्यथनादीगु दु । वडाध्यक्ष महर्जन नं लकडाउनया इलय् कोरोना संक्रमित जूगु खःसा सर्टमूभि ...अकाल...य् कलाकार रुपेन श्रेष्ठ थक्वाःमिं यानादीगु अभिनय थःम्हं हे अभिनय यानाच्वनागु महसुस जूगु खँ न्ह्यथनादीगु दुसा वय्कलं सर्टमूभि ...अकाल...धात्थें धायेगु खःसा नेवाः पुचलं निर्माण याःगु खस नेपाली भाषाया उत्कृष्ट सर्टमूभि जुइत ताःलाःगु विचाः तयादिल ।

नुगःखँ तयेगु हे झ्वलय् सर्टमूभि ...अकाल...या छम्ह कलाकार बरिष्ठ संकिपाकःमि शुशील राजोपाध्यायं सर्टमूभि ...अकाल...निर्माणया ईया लुमन्ति न्ह्यब्वयादीगु खः ।

सर्टमूभि ...अकाल...या मू कलाकार रुपेन श्रेष्ठ थक्वाःमिं लसकुस न्वचू तयादीगु उगु ज्याझ्वलय् कलाकार थक्वाःमिं सर्टमूभि ...अकाल...या विषयस खँ तसें सुटिंगया इलय् जूगु अविष्मरणीय क्षणत न्ह्यब्वःसें सकलसित लसकुस यानादीगु खः ।

सर्टमूभि ...अकाल...य् रुपेन श्रेष्ठ थक्वाःमि, शुशील राजोपाध्याय, सरिता बज्राचार्य, सुरेन्द्र महर्जन तापाख्यःमि, सुरेश महर्जन, रुजन महर्जन, विक्रम महर्जन व अखबर श्रेष्ठपिन्सं अभिनय यानादीगु दु ।

अथेहे, सुरज मालीं साउण्ड व ब्याक राउण्ड म्यूजिकया ज्या यानादीगु दुसा मतिना महर्जनं मेकअप आर्टिष्टया रुपं ज्या यानादीगु दु ।

 थ्वहे झ्वलय् सर्टमूभि ...अकाल...या टाइटल एनिमेशन दिपु महर्जनं यानादीगु दुसा साउण्ड एक्ट्रेस कथं समाचार वाचिका जुयाः सुजना श्रेष्ठं म्हितादीगु दु ।

ज्याझ्वलय् नेवाः एफएम १०६.६ मेगाहर्जया स्टेशन म्यानेजरलिसें पत्रकार विरेन्द्र शाक्यलिसें थीथी संचारकःमि व संकिपाकःमि योवन शाक्यया नं विशेष उपस्थिति दूगु खः ।

सर्टमूभि ...अकाल...प्रिमियर शो लिसें यूट्युब च्यानलय् सार्वजनिक ज्याझ्वलय् रक्की महर्जनं सुभाय् न्वचू लिसें ज्याझ्वः क्वचायेकादीगु खःसा ज्याझ्वः संचारकःमि ललेन्द्र शाक्यं न्ह्याकादीगु खः ।

Categorized in कला