zero media family planning adv

कोभिड १९ या प्रकोप अप्वयेधुंकाः भारतया महाराष्ट्रय् कडा प्रतिबन्ध घोषणा

नेवा: अनलाइन न्युज – ललेन्द्र शाक्य | २०७७ चैत्र २३, सोमबार १४:०३:२४

कोरोना भाइरसया संक्रमण अतिकं तीव्र गतिं ब्वलनाः वयेधुंकाः भारतया महाराष्ट्र राज्यय् कडा प्रतिबन्धया घोषणा याःगु दु । अनया सरकारं बहनीया इलय् कर्फ्यूया लिसें साप्ताहिक विदाया इलय् अर्थात् शनिवाः व आइतवाः लकडाउन तकं जुइगु कथं सोमवाःनिसें थुज्वःगु प्रतिबन्धया व्यवस्था लागू याःगु खः ।

अनया सरकारं ब्यूगु जानकारी कथं उगु राज्य दुने बहनीया इलय् कर्फ्यू तयेगु जुइसा वाःया लिपांगु दिं व बिदाया दिनय् शनिवाः व आइतवाः पूर्ण रुपं लकडाउन लागू जुइगु धाःगु दु ।

भारतय् लिपांगु इलय् कोभिड १९ या आपालं संक्रमित लुयावःगु दु । अन आइतवाः जक नं छन्हुं हे ९३ हजार २४९ म्ह संक्रमित थप जूगु स्वास्थ्य अधिकारीपिन्सं जानकारी ब्यूगु दु ।

इमिगु कथं थ्व ल्याः वंगु सेप्टेम्बर महिना थुखेया सर्वाधिक आपालं ल्याः नं खः । उगु ल्याःया बच्छिसिबें अप्वः महाराष्ट्र राज्य दुने संक्रमित थप जूगु दु ।

थ्व राज्य सुरुनिसें हे अप्वः लिच्वः लाःगु राज्य कथं लानाच्वंगु दु । भारतीय प्रधानमन्त्री नरेन्द्र मोदीं अन लिपांगु इलय् ब्वलंगु संक्रमणया हुनि लुइकेगु नितिं छगू विशेषज्ञ पुचःयात अन खटेयायेगु निर्णय आः नकतिनि याःगु खः ।

भारत कोरोना भाइरस महामारीया निगूगु लहरया जोखिमय् लाःगु धाःगु दु । कोभिड १९ या हुनिं भारतय् आःतक थ्यंमथ्यं १ लख ६५ हजारम्ह मनूतसें ज्यान गुमेयायेधुंकूगु दु । अथेहे, आःतक अनया संक्रमण पुष्टि जूपिनिगु ल्याः १ करोड २५ लखसिबें अप्वः दूगु नं अधिकारीपिन्सं जानकारी ब्यूगु दु ।

शुक्रवाः जक महाराष्ट्र राज्यया मुख्यमन्त्री उद्धव ठाकरें अनया नागरिकपिन्सं सुरक्षाया उपायत मछ्यःगु हुनिं थुज्वःगु कथं समस्या वःगु धाःगु खः । वं अनया सरकारं आग्रह यानाच्वंगु जूसां नं मास्क तयेगु त्वःतूगु हुनिं खोप कायेधुंकूसां नं सुं सुं संक्रमित जूगु जानकरी नं ब्यूगु खः ।

मन्त्री ठाकरें टेलिभिजन सम्बोधनया झ्वलय् धाःगु दु, मनूत सामान्य अवस्थाय् थें यानाः सतकय् जुइगु नं यानाहःगु दु तर नं अर्थतन्त्रय् ध्यान बिइगु कि स्वास्थ्य क्षेत्रय् धैगु विषयस सरकार धाःसा दुबिधाय् लाःगु दु ।

Categorized in अन्तर्राष्ट्रिय