नेवा: अनलाइन न्युज – ललेन्द्र शाक्य | नेपाल संवत ११४४ चौथी (२०८१ जेष्ठ १४ गते) सोमवाः

कान्तिपुरया मालिक ‘कैलाश सिरोहियाया बचाउ’स क्वाहाँ वयेधुंकाः विवादय् लाःपिं हाँस्य कलाकारपिं ख्यालिजुजु मदनकृष्ण श्रेष्ठ व हरिवंश आचार्यं थःपिनिगुपाखें गल्ती जूगु स्वीकार याःगु दु ।

ज्याझ्वःया झ्वलय् अष्ट्रेलियाय् थ्यंकूपिं कलाकारपिं श्रेष्ठ व आचार्यं थौं सोमवाः छगू भिडियो हलंज्वलंपाखें कैलाश सिरोहियाया बचाउस क्वाहाँ वयागुप्रति क्षमाचाचना याःगु खः ।

मह जोडीं थःपिं हे तायेकाः माफी बिइत नं इनाप याःगु दु । नागरिकता कीर्ते प्रकरणय् कैलाश सिरोहिया ज्वनेधुंकाः कान्तिपुरया पत्रकारपिन्सं फोन यानाः सिरोहियाया पक्षय् न्वःवानाः बिइत महजोडीयात इनाप याःगु खः । तर, उगु अभिव्यक्ति विवादय् यंकल ।

ख्यालिजुजु मदनकृष्ण श्रेष्ठं धयादीगु दु, “उखुन्हु हे जिपिं छगू एफएमय् च्वनाः अष्ट्रेलियाय् वयेगु विषयस सहलह ब्याकाः च्वनागु खः । वहे इलय् वसिबें गम्भीर रुपं मेगु अदालतय् विचाराधीन विषयस पत्रकार पासापिं च्वनाः खँल्हाबल्हा यानाच्वंगु जुयाच्वन । छगू मुडय् च्वनाच्वंगु इलय् आकाझाकां टीभीइ न्वःवायेगु प्रस्ताव वल । जिपिं अकमके जुया छु न्वःवायेगु गुकथं न्वःवायेगु धैगुलि । आकाझाकां न्वःवानाबलय् छुं त्रुटि जूवंगु महसुस जूगु दु ।”

हरिवंश आचार्यं धयादीगु दु, “अदालतय् विचाराधीन मुद्दाया विषयस न्वःमवाःगु जूसा ज्यूगु खः । जिपिंपाखें त्रुटि जुल । थः हे मनू तायेकाः माया यानाब्यूगु दु । फुक्क खँ ल्वःमंकाः माफी बिइत इनाप यानाच्वना ।”

Categorized in दुर्घटना-अपराध