ad prabhu

केपी ओली आक्रामक, प्रचण्ड रक्षात्मक

नेवा: अनलाइन न्युज – ललेन्द्र शाक्य | २०७७ कार्तिक २४, सोमबार ११:४३:४५

सत्तारुढ दल नेपाल कम्युनिष्ट पार्टीया विवाद थप गम्भीर अवस्थाय् थ्यंगु दु । बैठक च्वनेगु व मच्वनेगु विषययात कयाm शीक्र्ष नेतृत्व दथुइ विवाद हाकनं उतकर्षय् थ्यंगु दु ।

प्रधानमन्त्री लिसें पार्टी नायः केपी शर्मा ओलीं सचिवालयया बैठक मसःतेगु अडान कायेधुंकाः मेम्ह नायः पुष्पकमल दाहाल प्रचण्डलिसें न्याम्ह नेतापिन्सं नायः ओलीयात लिखितरुपं हे पौ लःल्हानाः तत्काल बैठक सःतेत माग याःगु दु ।

सचिवालयया बहुमत दुजःपिन्सं लिखितरुपं हे बैठकया माग यायेधुंकाः ओलीं पूर्वएमालेया नेतापिन्त छगू हे थासय् हयेगु गृहकार्य न्ह्यःने यंकूगु दु ।

प्रचण्डलिसे सम्बन्धय् पंगः वयेधुंकाः थ्वसिबें न्ह्यः निक्वःतक बरिष्ठ नेता माधवकुमार नेपाललिसे ब्यागलं नापलायेगु ज्या याःम्ह ओलीं आइतवाः हाकनं माधव नेपाललिसें प्यम्ह नेतापिंलिसे नापलायेगु ज्या याःगु दु ।

ओलीं पार्टी गम्भीर मोडय् थ्यंगु धासें थःत ग्वाहालि यायेत आग्रह याःगु नापलायेगु ज्याय् सहभागी छम्ह नेतां धाःगु दु । उम्ह नेतां ओलीया धापू उदृत यासें धाःगु दु, पार्टीइ गम्भीर संकट खनेदूगु दु, थुज्वःगु इलय् विवाद समाधान यानाः न्ह्यःने वनेत छिगु ग्वाहालि माल, म्हिगः नं झीसं थ्व पार्टी निर्माण यानागु खः, आः मिलेजुयाः न्ह्यःने वनेमाल ।

लिसलय् नेता नेपालं पार्टीं याःगु निर्णय कार्यान्वयन मजूबलय् आःया अवस्था ब्वलंगु धासें ओलीयात कार्यशैली सचेयायेत आग्रह याःगु खः । सहलहस नेता भीम रावल, सुरेन्द्र पाण्डे, रघुजी पन्त लिसेंया नेतापिं सहभागी जूगु खः ।

आइतवाः न्हिनय् १ः३० ता ईनिसें ४ः१५ ता ईतक ओलीं माधव नेपाललिसें प्यम्ह नेतापिंलिसे सहलह ब्याकूगु खः ।

(आजको नेपाल समाचार पत्र न्हिपतिइ थौं पिदंगु बुखँ)

Categorized in पत्रपत्रिका