nepal life 2076 3 18

केपी ओलीं सी जिनफिङया नक्कल यात

नेवा: अनलाइन न्युज – ललेन्द्र शाक्य | २०७८ आश्विन १६, शनिबार १२:१६:०९

नेकपा एमालेया विधान महाधिवेशनय् गोदावरीइ च्वंगु सम्मेलन केन्द्रया दबूया डिजाइन ठ्याक्क हे चिनियाँ कम्युनिष्ट पार्टीया शतवार्षिकीइ ग्वसाः ग्वःगु सम्मेलनया दबूलिसे ज्वःलाक्क समाः याःगु दु । दबूया पृष्ठभूमिइ ह्याउँगु कापः खनेदु । उकिया समाः ठ्याक्क हे चिनियाँ कम्युनिष्ट पार्टीया सम्मेलनया दौरान दबुली जूगुथें खनेदु ।

पृष्ठभूमिइ ह्याउँगु कापःया दथु ब्वय् सुर्द्यः चिं दुने ईंचा मुगःचा खनेदु । चिनियाँ कम्युनिष्ट पार्टीया सम्मेलनया दौरान दथु ब्वय् अथेहे ईंचा मुचःचा तयातःगु दु । दबुली चिनियाँ कम्युनिष्ट पार्टीया नेता सी जिनफिङलिसें बरिष्ठ नेतापिं च्वनाच्वंगु खः । अथेहे नेकपा एमालेया सम्मेलनय् नायः केपी शर्मा ओलीलिसें बरिष्ठ नेतापिं च्वंगु दु ।

चिनियाँ राष्ट्रपति तकं दूगु कम्युनिष्ट पार्टीया नेता सीं शक्ति विस्तार यासें यानाः यंकाः पार्टीया विधान हे हिलाबुला याःगु खः । चिनियाँ कम्युनिष्ट पार्टीया इतिहासय् सी जिनपिङ माओत्से तुङ लिपाया शक्तिशाली जुल । कम्युनिष्ट पार्टीइ निगू कार्यकालसिबें अप्वः नेतृत्वय् च्वनेमदइगु विधानय् हे दूगु खः । सीं उकियात हिलाबुला यानाः थः आजीवन नेता जुइफइगु व्यवस्था यात ।

पायछि अथेहे, ओलीं विधान हिलाबुला यायेत्यंगु दु । वं ७० दँ उमेर हदय् हिलाबुला यायेत्यंगु दु । ओलीं थः आजीवन नेकपा एमालेया नायः जुइ दइगु कथं व्यवस्था यायेत्यंगु दु ।

सीं गथे माओ लिपाया नेतापिन्त आझेलय् लाकेगु कथं पार्टीयात थः केन्द्रीत यात, ओलीं वहे शैली छ्यःगु दु । कम्युनिष्ट पार्टीइ विगतय् सिद्धान्त प्रतिपादन याःपिं अन्तर्राष्ट्रिय नेता व दिवंगत नेतापिनिगु किपाः ब्वइगु खः । ओलीं थःगु किपाःयात लाक्वपाक्व उखेंथुखें तयेके ब्यूगु दु । सतकनिसें ज्याझ्वः जुइगु थासय् तक नं ओलीया तःपाःगु किपाः तःगु दु ।

सीं माओ लिपा चिनियाँ कम्युनिष्ट पार्टीइ थःगु विचारधारा हे मू खः धैगु दयेकल । ओलीं नं मदन भण्डारी लिपा नेकपा एमाले दुने थःगु विचाः मू खःथें यानाः न्ह्यबल । थुलितक कि पुष्पलाल श्रेष्ठ दुबलय् स्थापित कम्युनिष्ट पार्टी नेकपातक थ्यंकाः हाकनं विभाजन लिपा दयेकूगु नेकपा एमाले नं नेकपाया हे विरासत जूगु न्ह्यथंगु दु ।

ओलीं राजनीतिक प्रतिवेदन न्ह्यब्वःबलय् चीनया अतिकं प्रशंसा यात । वं भारतं नेपाःयात खतरा दूगु गुकथं न्ह्यब्वःबलय् चीनं समाजवादपाखेया यात्राय् तःधंगु सफलता हासिल याःगुलिं बधाई बिल ।

Categorized in राजनीति