ad prabhu

केपी ओलीं धाल, कि जि लिचिले, कि प्रचण्ड लिचिलेमाः

नेवा: अनलाइन न्युज – ललेन्द्र शाक्य | २०७७ मङ्सिर ४, बिहिबार १५:२२:२१

प्रधानमन्त्री तकं जुयाच्वंम्ह नेकपा नायः केपी शर्मा ओलीं सचिवालय बैठकय् थःत ब्यूगु द्वपं सत्य मखूगु जूसा कार्यकारी नायः प्रचण्डं पदपाखें लिचिलेमाःगु धाःगु दु । यदि द्वपं सत्य सावित जूसा थः पदं लिचिलेगु ओलीं स्पष्ट याःगु दु ।

नेकपा सचिवालय बैठकय् कार्यकारी नायः प्रचण्डं न्याम्ह सचिवालय दुजःपिनिगु तकं समर्थन दूगु राजनीतिक प्रस्ताव पेश याःगु खः । उगु प्रस्तावय् सरकार व ओलीया व्यक्तिगत कार्यशैलीइ तकं न्ह्यसःचिं थनातःगु दु । उकियात ओली व ओली पक्षीय नेतापिन्सं राजनीतिक प्रस्ताव मजूसे द्वपं पौ जक जूगु धयाः वयाच्वंगु दु । उगु द्वपं पौ लितमकाःतले मेगु बैठकय् मच्वनेगु अडान काःसां नं बुधवाः लिपांगु इलय् बैठकय् सहभागी जूम्ह ओलीं १० न्हुलिपा उकिया लिसः बिइगु धाःगु दु ।

बैठकय् थःगु धारणा तसें ओलीं धाःगु दु, थुकिया जिं लिसः तयार यानागु मदुनि । थुकी सिम्प्ली सहलह ब्याकेत व छिनोफानो यायेत जक बैठक जुइफु । यदि थ्व सही जूसा छम्ह लिचिलेमाः, सही मजूसा मेम्ह लिचिलेमाः ।

थःत नायः व प्रधानमन्त्री निगुलिं पदं चिइकेगु तयारी याःगु धासें ओलीं, थःम्हं नं कार्यकारी नायः प्रचण्डयात पदं लिचिलेत धाल धाःसा छु जुइ ? धकाः नं न्ह्यसःचिं थंगु दु ।

ओलीं धाःगु दु, मेगु खँ जिं धायेमाः, जितः नायः व प्रधानमन्त्री निगुलिं पदपाखें चिइकेगु तयारी नं याःगु दु, लिचिलेत धाःगु नं दु । अथेहे, जिं मेम्ह नायःयात लिचिलेत धाल धाःसा छु जुइ ? विधि पद्धतिया खँ छु जुइ ? संगठनात्मक सिद्धान्तया खँ छु जुइ ? उकी छक्वः विचाः यायेगु खः कि ? छाय् धाःसा जिं लिच्यु धाल धाःसा उकिं ला मेगु वातावरण निर्माण् जुइफु ।

थः सचिवालयस अल्पमतय् लाःगु धकाः सार्वजनिक जुयाच्वंगु बुखँयात ओलीं खारेज तकं याःगु दु । पिने बजारय् ला हल्ला न्यनागु दु, बहुमत दु, अल्पमत दु, छु दु, सुयागु गथे च्वं धैगु खँ आपालं न्यनागु दु । जिं उज्वःगु फर्मल्ली खनागु मदु । फर्मल्ली मखंतले उकियात बहुमत, अल्पमत मानेयायेगु खँ नं मजुल  धकाः ओलीं धाःगु दु ।

नेकपाया ९ म्ह दुजःया सचिवालयस प्रचण्ड पक्षपाखे प्रचण्डलिसे झलनाथ खनाल, माधव नेपाल, बामदेव गौतम व प्रवक्ता नारायणकाजी श्रेष्ठ दु । ओली पक्षय् ओलीलिसें महासचिव विष्णु पौडेल, ईश्वर पोखरेल दु । गृहमन्त्री तकं जुयाच्वंम्ह रामबहादुर थापा बादल खुलेजुयाः प्रचण्डपाखे खनेमदुगुलिं बादलयात नं ओली पक्षीय धायेगु यानाः वयाच्वंगु दु ।

वंगु शुक्रवाःया सचिवालय बैठकय् प्रचण्डं बहुमत दुजःपिनिगु पाखें राजनीतिक प्रस्ताव पेश याःगु खः । उगु प्रस्ताव एकपक्षीइ रुपं बैठकय् वःगु धासें ओली पक्षया नेतापिन्सं उकियात सहलहया विषय मजुइगु धकाः अडान कयाः वयाच्वंगु दु । बुधवाःया बैठकय् नं प्रधानमन्त्री ओलीं छम्ह नायःयात जानकारी मब्यूसे मेम्ह नायः नं प्रस्ताव हये मज्यूगु धाःगु दु ।

प्रधानमन्त्री ओलीं द्वपंत ज्वनाः सुं नं मनू नायः वा प्रधानमन्त्रीया जिम्मेवारीइ च्वने मज्यूगु धाःगु दु । ओलीं धाःगु दु, थ्व द्वपंलिसें थ्व द्वपं ज्वनाः जिनाः सुं नं मनूत नायः वा प्रधानमन्त्रीया जिम्मेवारीइ च्वने ला मिलेमजू । थुगु द्वपं कि मखुसा वपाखें बदर जुइमाल उबले प्रधानमन्त्री वा नायःया जिम्मेवारीइ च्वने मिलेजुइ । अथे मखुसा सदर जुइमाल व उगु पद व उगु जिम्मेवारीपाखें लिचिलेमाल । थ्व द्वपं सही ठहर जुइमखुसा उज्वःगु द्वपं बिइम्हं उकिया जिम्मेवारी कायेमाल, थुकिया जवाफदेही कायेमाल ।

प्रधानमन्त्री ओलीं थःगु राजनीतिक जीवन क्वचायेकेगु कथं द्वपंत ब्यूगु धासें उकिया लिसः लिखित रुपं हे बिइगु धाःगु दु ।

मिलेजूसा जक हे पार्टी बचेयायेफइगु धासें प्रम ओलीं धाःगु दु, ल्वानाः पार्टी बचेजुइमखु, जालझेल व तिक्डम यानाः पार्टी बचेजुइमखु । गुटबन्दी यानाः पार्टी बचेजुइमखु । फुक्क खँय् लिपा सहलह याये । थौं जि थुगु लाञ्छना पौ, गुगु जितः ब्यूगु खः, उगु पतिइ सकतां द्वपं, अभियोग, लाञ्छना, तिरस्कार, अपमान फुक्क खारेज याये । थ्व जिगु राजनीतिक जीवन हे समाप्त यायेगु कथं हःगु द्वपं पौयात जिं पूर्ण रुपं अस्वीकार याये । उकिया यथोचित लिसः जिं लिखित रुपं हे न्ह्यब्वयेगु जुइ ।

Categorized in राजनीति