nepal investment baink

केन्याय् बस दुर्घटना : ११ म्ह विद्यार्थी सित, ४२ म्ह घाःपाः

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व एकादसी (२०८० चैत्र ७) बुधवाः

केन्याली विश्वविद्यालयया विद्यार्थीपिं च्वनावंगु छगः बस आपालं वा वःगु हुनि चुलयाः व्यस्त राजमार्गय् ट्रकलिसे ल्वानाः कम्ती नं ११ म्ह विद्यार्थी सीगु दुसा ४२ म्ह तच्वकं घाःपाः जूगु प्रहरीं जानकारी ब्यूगु दु ।

केन्याया राजधानी नैरोबीपाखें ३६० किलोमिटर तापाक्क च्वंगु माउन्गुइ स्थानीय ईकथं सोमवाः सनिलया ५ः५० ता इलय् केन्याटा युनिभर्सिटीया विद्यार्थीपिं तटीय सहर मोम्बासापाखे वनाच्वंगु इलय् दुर्घटना जूगु खः ।

दुर्घटनाय् झिम्ह विद्यार्थी घटनास्थलय् हे सीगु व छम्ह अस्पतालय् वासः यायेगु झ्वलय् सीगु प्रहरीं जानकारी ब्यूगु दु ।

प्रहरीं ब्यूगु धलखय् धयातःगु दु, “आपालं वा वयाच्वंगु इलय् विश्वविद्यालयया बस चालकं मेमेगु सवारी साधनयात उछितेयाःबलय्  ५८ म्ह च्वनावंगु बस सतकया जवपाखे चुलुयाः ट्रकलिसे ठक्कर नःगु खः ।”

केन्याली रेडक्रसं घाःपाः जूपिन्त लिक्कच्वंगु भोइ सहरया छगू अस्पतालय् यंकूगु खः ।

पूर्वी अफ्रिकी राष्ट्र केन्याय् खराब सतक संरचना, पुलांगु सवारी साधन व चालकया लापरवाहीया हुनिं जुइगु सतक दुर्घटनाया हुनिं दँय् दसं सलंसः मनूत अकालय् सिनाच्वंगु दु ।

राष्ट्रिय यातायात व सुरक्षा प्राधिकरणया तथ्यांक कथं केन्याय् सन् २०२३ स सतक दुर्घटनाय् लानाः ४ हजार ३ सय २४ म्ह सीगु दुसा १८ हजार ५ सय ६१ म्ह घाःपाः जूगु दु ।

अय्सां, सन् २०२४ जनवरी १ निसें फेब्रुअरी ११ या दथुइ ५ सय ३६ म्ह सीगु दु । गुगु वंगु दँया वहे ईया तुलनाय् न्यागू प्रतिशत अप्वःगु खः ।

फेब्रुअरी ११ स जूगु सतक दुर्घटनाय् २४ दँया विश्व म्याराथन कीर्तिमानधारी केल्भिन किप्टम नं सीगु खः ।

Categorized in अन्तर्राष्ट्रिय