नेवा: अनलाइन न्युज – ललेन्द्र शाक्य | ने.सं. ११४४ चिल्लागा चौथी (२०८१ बैशाख १६ गते) आइतवाः

केन्द्रीय मानन्धर संघं ३४ क्वःगु अधिवेशनं न्हूम्ह नायः पदय् थँहिति त्वाःया सुवर्ण मानन्धरयात ल्यःगु दु ।

नेपालभाषा मंकाः खलःया दबू छेँय् म्हिगः शनिवाः जूगुअधिवेशनं थथे मानन्धरयात न्हूम्ह नायः ल्यःगु खः ।

निर्वाचन पुचःया संयोजक पंचकुमारी मानन्धर, दुजःपिं प्रा.डा. भगवान मानन्धर, ई. अमरबहादुर मानन्धरपिन्सं न्हूम्ह नायः पदय् छम्ह जक उम्मेदवारया नां दर्ता जूगुलिं सुवर्ण मानन्धरयात न्हूम्ह नायः कथं घोषणा याःगु खः ।

केन्द्रीय मानन्धर संघया छ्याञ्जे गजेन्द्र मानन्धरं बियादीगु जानकारी कथं मानन्धर संघया विधानकथं नायःया ज्या यायेगु ई निदँया कार्यकाल जूगुलिं थ्वया न्ह्यः नायः जुयादीम्ह मनोज कुमार मानन्धरयात बिदाई बियाः न्हूम्ह नायः ल्यःगु खः ।

छ्याञ्जे मानन्धरं नायः बाहेक मेपिं झिंन्याम्ह केन्द्रीय दुजःपिनिगु ज्या यायेगुलि प्यदँया कार्यकाल जूगु जानकारी बियादीगु दु ।

Categorized in नेवाः