nepal life 2076 3 18

केन्द्रीय दुजलय् उम्मेदवारी बिइ, थ्व महाधिवेशनं सवल नेतृत्व बिइफयेमा : राजन केसी

नेवा: अनलाइन न्युज – ललेन्द्र शाक्य | २०७८ मङ्सिर ९, बिहिबार १५:००:२०

प्रमुख सत्तारुढ दल नेपाली कांग्रेसया नेता व सांसद राजेन्द्रकुमार (राजन) केसीं पार्टीया १४ क्वःगु महाधिवेशनं मुलुकयात समृद्धिया दिशाय् न्ह्यःने यंकीगु नेतृत्व ल्ययेगु धाःगु दु ।

सांसद केसीं धाःगु दु, ‘मुलुकयात दिशा बिइफुपिं व समृद्धिया दिशाय् न्ह्यःने यंकीगु नेतृत्व वइगुलि जिमिसं पियाच्वनागु दु । थ्व अधिवेशनं सवल नेतृत्व बिइफयेमा ।’

केसीं थःम्हं थुगुखुसि केन्द्रीय दुजलय् उम्मेदवारी बिइगु नं धाःगु दु । वं आः एमाले, माओवादी केन्द्रया नं अधिवेशन जुइत्यंगु धासें लोकतन्त्र बल्लाकेगु नितिं दलया अधिवेशन आवश्यक जूगु धाःगु दु ।

नेता केसीं नीति व नेतृत्व नापनापं वनेमाःगु खँय् नं बः ब्यूगु दु । वं फुक्क लया गन्तव्य छगू हे जूगु तर लँपु जक फरक जुइफूगु धाःगु दु ।

नेता केसीं धाःगु दु, ‘आः फुक्क पार्टीया अधिवेशनया लँपुइ दु । फुक्क दलया चाहना धयागु मुलुकयात समृद्ध यायेगु हे खः । बहुदलीय प्रजातन्त्रय् यक्व पार्टी दइ । दलतसें जनतायात थःगु नीति कथं आकर्षित याकीगु खँ स्वभाविक हे खः । एमाले, माओवादी व राप्रपां आः महाधिवेशन यायेत्यंगु दु ।’

Categorized in राजनीति