prabhu baink new

कुलमान हाकनं नियुक्ति यायेत प्रम ओलीं अस्वीकार याःगु खुलासा

नेवा: अनलाइन न्युज – ललेन्द्र शाक्य | २०७७ आश्विन १, बिहिबार १२:३४:२३

नेपाल विद्युत प्राधिकरणया कार्यकारी निर्देशकय् कुलमान घिसिंगयात हाकनं नियुक्ति यायेत मन्त्रिपरिषदया बैठकय् ऊर्जामन्त्री बर्षमान पुनं औपचारिक प्रस्ताव यंकूगु खुलासा जूगु दु । पुनं प्रस्ताव यंकूसां नं उगु प्रस्तावयात न्ह्यःने मयंकूगु सीदूगु दु ।

ऊर्जामन्त्री वर्षमान पुनया सचिवालय प्रमुख दुर्गाप्रसाद चापागाईं नं सामाजिक संजालय् बिहिवाः घिसिंगया हाकनं नियुक्तिया प्रस्तावबारे खुलासा याःगु खः । वं कुलमानयात प्यदँया नितिं प्राधिकरणया कार्यकारी निर्देशकय् नियुक्त यायेत मन्त्री पुनं मन्त्रिपरिषद बैठकय् प्रस्ताव यंकूगु व उगु प्रस्ताव विचाराधीन जूगु तकं उल्लेख याःगु दु ।

थ्वसिबें न्ह्यः सोमवाः हे कुलमान घिसिंगयात प्राधिकरणया कार्यकारी निर्देशकय् हाकनं नियुक्ति यायेत प्रधानमन्त्री ओलीपाखें बहिष्कार शिर्षकय् थुकिया खुलासा जूगु खः ।

मन्त्रिपरिषदं उगु प्रस्तावयात याकनं हे निर्णय याइगु आशा तकं याःगु दु । थौं बिहिवाः मन्त्रिपरिषद सःतूगु सन्दर्भय् मन्त्री पुनया सचिवालय प्रमुख चापागाईंया धारणा सार्वजनिक जूगु खः । थुकियात अतिकं अर्थपूर्ण कथं काःगु दु ।

थ्वसिबें न्ह्यः सोमवाःया मन्त्रिपरिषद बैठकय् कुलमान घिसिंगया हाकनं नियुक्तिया प्रस्ताव थ्यंबलय् प्रधानमन्त्री ओलीया कानूनी न्ह्यसः थनाः बेवास्ता याःगु खः । प्रधानमन्त्री ओलीया टिम कुलमानयात हाकनं नियुक्ति बिइगु पक्षय् मदु । थुकिया संकेत प्रधानमन्त्रीया प्रेस सल्लाहकार सूर्य थापां यायेधुंकूगु दु ।

Categorized in राजनीति