1142 nhoo dan adv

कुतः पिकाकःपाखें ‘ईया किचलय्’ चिबाखं मुना पितब्वज्या

नेवा: अनलाइन न्युज – Bijay Ratna | २०७८ कार्तिक २५, बिहिबार १०:२६:०९

कुतः पिकाकः ख्वपया ग्वसालय् ख्वपया भक्तपुर पार्टी भेन्युइ जूगु छगू ज्याझ्वलय् बाखं च्वमि हरिगोबिन्द भोमीया ‘ईया किचलय्’  नांयागु नेपालभाषाया चिबाखं मुना सफू पितब्वज्या जुउगु दु  । बरिष्ठ आख्यानकार भाषाथुवाः मथुरा सायमिं उगु सफूया पितब्वज्या यानादीगु खः ।  

पितब्वज्या ज्याझ्वलय् बरिष्ठ आख्यानकार भाषाथुवाः सायमिं देसय् न्ह्यानाच्वंगु एकल भाषा नीतियात त्वाःथलेत न्हापां थःगु भाषां खँ ल्हायेगु, थःगु भासं च्वयेगु व ब्वनेगु निरन्तर रुपं अभ्यास यानाच्वनेमाःगु खँ कनादिल । वय्कलं सुंक च्वन धाःसा झी झन् लिउने लाइ धयादिसें थःथःगु थासं सकसिनं कुतः यायेमाः धयादिल ।

कुतः पिकाकःया कजि विमल ताम्राकारया सभानायःसुइ जूगु उगु सफू पितब्वज्या ज्याझ्वलय् प्राज्ञ ध्रुव मधिकर्मिं उगु सफूया समीक्षा यानादिसें मनूतय्के कमजोरी दयाच्वनी, तर उकियात न्हंकेगु निंतिं च्वमि साहित्यकारपिन्सं लँ क्यनाः बिइमाःगु खँ कुलादिल ।

निबन्धकार व समालोचक पूर्णकाजी ताम्राकारं नेवाः आन्दोलनया प्रभावं नं आपालं च्वमि लेखक तयार जुयाच्वंगु खँ कनादिसें साहित्य सिर्जनां ताःईतक भाषा म्वानाच्वनीगु खँ कनादिल ।

चिबाखं च्वमि श्याम आशां नं भिन्तुना न्वचू बियादीगु उगु ज्याझ्वलय् च्वमि हरिगोबिन्द भोमीं पितब्वज्या जुउगु थःगु सफूपाखें छपू  बाखं ब्वनाः न्यंकादिल ।

ज्याझ्वलय् लुँध्वाखा स्वलापौया प्रकाशक विष्णुकेशरी ताम्राकारं लसकुस यानादीगु खःसा सफू पितब्वज्या समारोह मय्जु हसना लवजुं न्ह्याकादीगु खः ।

 

Categorized in नेवाः